«Егеменнің» басшысы «Жайық Пресс» медиахолдингінде болды

«Егемен Қазақстан» Республикалық газеті» акционерлік қоғамының Басқарма төрағасы Дархан Қыдырәлі бүгін жұмыс сапарымен Орал өңірінде болып,  "Жайық Пресс" медиахолдингінің басшысы Жантас Сафуллинмен және облыстық, аудандық басылымдардың журналистерімен кездесті. Бұл туралы осы медиахолдингтің сайты хабарлады. Жиналған қауымды ең алдымен Тәуелсіздік мерекесімен құттықтаған Д.Қуандықұлы ел газеті «Егеменде» енгізіліп жатқан өзгерістер мен жаңалықтарға тоқталды. Оқырманмен байланыс, журналистердің жұмыс жасау əдістері, ақпараттық жаңа технологияны тиімді пайдалану, жас мамандарды тəрбиелеу туралы ойларын бөлісті. «Қазақ халқының тарихындағы атақты хандар мен батырлардың мекені болған Жайық өңіріне келіп, ірі медиахолдинг болып саналатын "Жайық Пресс" орталығына бас сұғуымның бірнеше себебі бар. Соның ең бастысы – Қазақстандағы баспасөз ісінің батыстан бастау алуы, алғашқы газеттердің осы жерде басылуы. Олардың жинақталып, зерттеліп, жүйеленіп, кітап болып шығуы өзге басылымдар үшін үлкен өнеге, тағылым болып табылады. "Егемен Қазақстан" газетінің бастауы болған "Ұшқын" газетінің осы өңірден басылып шыққандығын біз өз тарихымыз ретінде танимыз. «Ұшқынның» алғашқы санынан бастап жинақтап, транскрипция жасап, хатқа түсіріп жатқан сіздерге зор ризашылығымызды білдіре отырып, әрі қарай да бірлесе жұмыс істейтін боламыз деген сенімдемін», – деді «Егеменнің» басшысы. Д.Қыдырәлі жуырда Əзірбайжан елінде өткен Баку Конгресінің 90 жылдығына арналған үлкен жиынға қатысып қайтқанын, латын әліпбиіне көшу жөнінде маңызды шешімдер қабылданған сол жиында әзірбайжандық əріптестерге "Жайық Пресс" медиахолдингінің бастамашылығымен жарық көрген "Қазақстан" кітабын осы ұжымның атынан сыйға тартқанын да айтып өтті.