Сүлейлер салған сүрлеумен

Соңғы екі аптаның ішінде Сыр бойының руханият саласы бір емес, бірнеше маңызды шарамен айшықталды. Тәуелсіздіктің 25 жылдығына арнап облыс әкімдігі халықаралық айтыс өткізді. Әрісі Қытай, Моңғолия, Қырғызстаннан, берісі өзіміздің елден ақын­дар қатысып, аламанның көркін қыздырды. Бас жүлдеге тігілген жеңіл көлікті қызылордалық Мұхтар Ниязов, екінші көлікті Алтай асып келген арқалы ақын Ұларбек Минет­ханұлы иеленді. Жыр еліне іле-шала Арқа мен Батыстың, Жетісу мен Сыр­дың саңлақтары дәстүрлі орын­даушылардың республикалық өнер фестивалінде күміс көмейден жыр тө­гілтті. Қазақстанның еңбек сіңір­ген қайраткері Алмас Алматов, жыршы Сәуле Жан­пейісова, еліміздегі бірден-бір манасшы Баянғали Әлімжанов, Жетісу, Арқа мектебінің өкілдері Рамазан Стамғазиев пен Ерлан Рысқали, Батыс жыр мектебінің орындаушысы Айгүл Қосанова, Ұлжан Байбосынова және тағы басқалар текті сөздің төресін теріп айтып, құлақ құрышын қандырды. Елмұра Жаңабергенова, Арнұр Көшеней, Серік Жақсығұлов, Күнсұлу Түрікпенова, Өмірқұл Айниязов тыңдарманның ыстық ықыласына бөленді. Ақынын ардақтаған ел азбайды. Ақын-драматург Асқар Кіребаевтың 70 жылдығына орай марқұмның шығармашылығы мен еңбегін насихаттау шаралары өткізілуде. Соның бірі – облыстық жас ақындар мүшәйрасы. Бақ сынағандар түрлі тақырыпта жазған дүниелерін оқып, шын жүйріктер дараланып шықты. Сондай-ақ, жуырда Қазақстан Жазу­шылар ода­ғының мүшесі, ақын Шаһизада Әбдікә­рімов­тің «Ақыл мен сезім бұрқағы» атты поэзия кеші өтті. Өткен ғасырдың сексенінші жылдары өлең патша­лығына талантты толқын келді. Солардың қатарында алғашқы жыр шумақ­тары 1975 жылы «Көктем тынысы» кітабына енген, бүгінде есімі елге мәлім Шаһизада Әбдікәрімов те бар. Ол ақын атанып қана қойған жоқ. Қалалық телеарнаны аяққа тұрғызуда талмай тер төкті. Бүгінде ол құрған «Қоғам ТВ» шығармашылық ұжымы мен материалдық-техникалық базасы қалыптасқан ақпарат құралына айналды. Шаһизада Өтетілеуұлы облыстық мәслихаттың депутаты ретінде де өңірдің өзекті мәселелерін шешуге үлес қосты. Ақынның шығармашылық кеші барысында Қазақстан Жазушылар одағы басқармасының хатшысы, ақын Ұлықбек Есдәулет жылы лебізін жеткізді. Сондай-ақ, ақын Жүрсін Ерман, әдебиетші-ғалым, ҰҒА кор­рес­пондент-мүшесі Бауыржан Омаров, Ұлттық телехабарлар тарату қауым­дастығының атқарушы директоры Шолпан Жақсыбаева, «Нұр Отан» партиясы облыстық филиалы төрағасының бірінші орынбасары Ибадулла Құттықожаев тілектестік білдірді. Осы кеште облыс әкімі Қырымбек Көшербаев  келесі жылдан бастап Сыр елінде «Пара­сатты поэзия» атты ақындар фести­валін өткізу жоспарланып отыр­ғанын жеткізді. Түркістандық айтыскер Бек­арыс Шойбековтің бірде «Сыр­дан алтын шықпауы мүмкін, бірақ ақын шықпауы мүмкін емес» дегені бар. Небір дүлдүлді түлеткен топырақтың киесі де осында болса керек. Ержан БАЙТІЛЕС, «Егемен Қазақстан»  Қызылорда облысы