Жаңа құжат нақтылығымен ерекшеленеді

Осы жылғы желтоқсанда өтетін еуразиялық «бестік» мемлекеттері басшыларының кездесуінде Еуразиялық экономикалық одақтың (ЕАЭО) Кеден кодексіне қол қойылады деп күтіліп отыр. Болжам бойынша, құжат 2017 жылдың ортасында күшіне енуі мүмкін. Бұл туралы ІІІ Еуразиялық экономикалық конгресс барысында Еуразиялық экономикалық комиссияның кедендік ынтымақтастық жөніндегі алқаның (министр) мүшесі Мұқай Қадырқұлов мәлімдеді. Бұқаралық ақпарат құ­ралдары өкілдерінің сұ­рақ­тарына жауап қай­тару ке­зінде ол осындай ауқым­ды құжат – жаңа кодекс ж­о­ба­сының үш жылдай мер­зім­де әзірленгенін де атады. Министрдің айтуынша, Еу­ропалық одақтың кедендік заң­намасын дайындауға он жыл­­дан астам уақыт кеткен. Ал Еуразиялық экономикалық ко­миссиясының кедендік заң­намалар департаменті ди­ректорының орынбасары Елена Бричева конгресте сөйлеген сөзінде кедендік рет­теу мәселелеріндегі ұлттық және ұлтүстілік сегменттегі өз­герістер туралы айтып берді. Елена Бричеваның атап өтуінше, қазіргі қолданыстағы Кеден кодексі 339 жөнелту нормасынан тұрады. Олардың бестен екісі салық, валюта, әкімшілік, азаматтық және басқа да заңнамалық нормалар. Сондай-ақ, ол осындай жөнелту нормалары жаңа кодексте де қалдырылғанынан хабардар етті. Бұған қоса, ол жаңа кодекстің мәтініндегі ұлтүстілік нормаларға да тоқ­талды. Негізінен ол кеден өкілінің ниеттестік мін­де­тіне, тауар­лардың шы­ғуы тура­лы алдын ала қабыл­дан­ған шешімдерді реттеуге, ке­дендік декларациялау ерек­ше­лік­теріне қатысты. Департамент директоры­ның орынбасары жаңа құ­жат қабылданғаннан кейін Ко­миссия реттеуге тиіс­ті мә­с­е­- лелердің едәуір көбей­еті­­нін де атап өтті. «ЕАЭО-ның Кеден кодексі Комиссия қа­рас­тыратын 279 нормадан тұ­рады, – деді Е.Бричева. – Осы 279 норманың 96-сы Ко­миссияның қазіргі кездегі мін­деті болып табылады. Ал 183 норма Комиссияның жаңа құ­жат бойынша қарастыратын жа­ңа құзыретіне жатады». Жалпы, жаңа кодекс жоба­сында көрсетілген нормалар барынша нақтылығымен ерек­шеленеді. Өйткені, Ке­ден­д­ік одақтың алты жылдан бері жұмыс істеп келе жат­қан Кеден кодексіндегі заң­намаларға қатысты кем­шіліктер түзетілген. Әлисұлтан ҚҰЛАНБАЙ, «Егемен Қазақстан»