Алматыдағы Ө.Жолдасбеков атындағы Студенттер сарайында Қазақ ұлттық аграрлық университетінің ұйымдастыруымен ел Тәуелсіздігінің 25 жылдығы, Алматы қаласының 1000 жылдығы мен Тұңғыш Президент күніне орай «Тәуелсіз елдің жастары – Ұлы Дала елінің тірегі» атты салтанатты кеш үлкен табыспен өтті.
Білім және ғылым министрлігінің, Алматы қаласы мен Алматы облысы әкімдіктерінің өкілдері, көрнекті мемлекет және қоғам қайраткерлері, белгілі қаламгерлер, ЖОО жетекшілері және білім мен ғылым, мәдениет салаларының үздік қызметкерлері мен ардагерлері қатысқан мерекелік іс-шарада еліміздің және аталған оқу орнының Тәуелсіздік жылдарындағы қол жеткізген жетістіктері туралы театрландырылған тарихи көріністер, сондай-ақ, университет жанындағы Студенттер ассамблеясы мен Алматы қаласы ұлттық мәдени орталығымен ұзақ жылдар бірлесе атқарған жұмыстарының нәтижелері көрініс тапты.
Рухани тағылымы мол мерекелік бағдарлама Әнұранмен басталып, университет жанындағы А.Жұбанов атындағы халық аспаптар оркестрінің орындауындағы құйқылжыған күйге ұласты. Одан әрі 1-курс студенттерінің сахналауымен аталған оқу орнының телестудиясында дайындалған егемендікке жету жолында халқымыздың басынан өткен әр жылдарды баяндайтын көркемсуретті және деректі фильмдерден үзінділер театрландырылған көріністермен өріліп отырды.
– Ғасырлар бойы ата-бабамыз аңсаған Тәуелсіздікке бүгінгі ұрпақтың қолы жетті, – деді 1-курс студенттеріне «Білім кілтін» тапсырып, сәттілік тілеген ҚазҰАУ ректоры, ҰҒА вице-президенті, академик Тілектес Есполов. – Тәуелсіздіктің арқасында іргеміз бүтінделіп, еңсеміз көтерілді. Қазақстан өркениетті мемлекеттер қатарына қосылды. Ұлы Дала төсінде ынтымақ пен береке орнады. Елімізді әлем мойындады. Бүгінгі жетістіктеріміздің бәрі – еліміздің Тұңғыш Президенті Нұрсұлтан Назарбаевтың жүргізіп отырған сарабдал саясатының нәтижесі. Ендігі мақсатымыз – қасиетті Тәуелсіздіктің тұғырын берік, келешегін кемел ету. Ал еліміздің кемел келешегі жастардың қолында. Заманға сай даму үшін жаңа технологияларды игерген, жаңаша ойлайтын білімді жастар қажет. Сондықтан, Мемлекет басшысы ел жастарына әлемдік деңгейде білім алуына барынша жағдай жасап келеді. Озық білім мен ғылымды игерген жастар – еліміздің ертеңгі тірегі.
Мерекелік кештің жоғары деңгейде өтуіне қазақ эстрадасының танымал әншілері Ә.Кәрімов, С.Ибрагимов, А.Әлекешов, Е.Құдайбергенов атсалысып, әннен шашу шашса, университет жанындағы «Гүлбану» ән-би ансамблі, «Эстрада» үйірмесінің талантты жастары да әуелете ән шырқап, мың бұрала биледі. Студенттер арнайы дайындаған заманауи флешмоб-би форматында оқу орнының әнұранын орындады.
Гүлзейнеп СӘДІРҚЫЗЫ,
«Егемен Қазақстан»
АЛМАТЫ