Қазақстанның қуатты мемлекет болып қалыптасуы жолында жасалып жатқан өлшеусіз еңбекті саралай келгенде, отандық экономиканың негізін құрайтын өндіріс орындарымен қатар аймақтардың да әлеуетін атап айту ләзім.
Алдымен осы тұтастық туының астына тоғыса келгенде, аймақтардың даму көші елордасы – Астанаға қарап бой түзейтіні тағы заңды. Яғни, Астана – еліміздің саяси басқару орталығы ғана емес, Отанымыздың әлеуметтік-экономикалық дамуының бағыт-бағдарын анықтап отырған әлеуетті көшбасшы. Ал еліміздегі қарқынды дамып оырған тағы бір ірі мегаполис ретінде Алматы қаласының да қуатты өңірлер көшінде өзіндік орны бар екені даусыз.
Астананың дамуына қатысты ақпараттарды шолып шықсақ, араға жыл салып үлгерген жетістіктердің жаңғырығы ойға оралады. Мәселен, 2015 жылы Астана ел өңірлері арасында ішкі өнім өсімінің ең жоғары көрсеткішіне ие болған екен. Яғни, қала экономикасы ІЖӨ-нің 5 пайыздық өсіміне қол жеткізіп, жалпы экономиканың өсіміне шаққанда 40 пайыздық межеден көрінген. Бұл – отандық экономикадағы кіріс көзінің қомақты бөлігін құрайтын өсім. Яғни, Астана қаласының 2015 жылғы экономикалық кірісі 900 млрд теңгеден асып, республикалық бюджеттің басты доноры ретінде бағаланды.
Астана – ел экономикасына сырттан тартылған инвестициялар ағымының көлемі жөнінен де көшбасшы. Жалпы, елорда құрылысы басталғалы бері салынған инвестиция көлемі 6 трлн теңгеден асып жығылады.
Айтпақшы, Астана бюджетіне қатысты сөз қозғалғанда, жақында ғана қала әкімі Әсет Исекешовтің жалпақ жұртқа жар салған мына жаңалығына тоқталмау мүмкін емес. «Алғаш рет Астана қаласының мемлекеттік бюджеті триллион теңгеден асты» деп жазған болатын дуанбасы өзінің әлеуметтік желідегі жеке парақшасына. Ал аймақтардың Астанаға қарап бой түзейтіндігіне қатысты тағы бірнеше дәлел келтіре кетуге болар. Бірінші кезекте биылғы мерекелі жылдың аясында атқарылған «Қуатты Қазақстан – қуатты өңірлер» акциясы тіл ұшына оралады. Акция аясында барлық облыстардың Астана қаласындағы мәдени күндері өтті. Бұл елорда мен ел өңірлері арасындағы біте қайнасқан байланыстың дәстүр мен мәдениетке қатысты шарасы ғана емес, экономикалық алыс-берістің сәтті жолға қойылуының да айқын көрінісі болды. Мысалға, қала тұрғындарының қолайына жаққан істің бірі – облыстардан келген ауылшаруашылық өнімдерінің жәрмеңкесі еді. Бағасы қолжетімді, азық-түлік пен ет өнімдерінің жүздеген түрі астаналықтар үшін қыстық ішіп-жем қорын қамтуға қолайлы болса, өңірден келген өнім өндірушілер үшін табыс көзіне айналды. Жекелей алғанда, Астана төрінде өткен жәрмеңкеге аграрлық аймақтар саналатын Алматы облысы жалпы құны 160 млн теңге тұратын отыз сегіз түрлі өнім ұсынса, Шығыс Қазақстан облысы 500 тоннадан астам ауылшаруашылық өнімдерін жеткізген, ал Қызылорда облысы құны 70 млн теңге болатын 400 тонна өнім саудалаған екен. Демек, осы мысалдың өзінен астаналықтардың азық-түлік өнімдеріне деген сұранысының орасан екендігі әрі барлық аймаққа шаққандағы төлем қабілеті жоғары тұтынушылардың елордада шоғырланғаны көрініс тауып отыр.
Ал, оңтүстік мегаполистің отандық экономиканың дамуына қосып отырған үлесін таразылағанда, бюджет түсімдері жөнінен облыстар арасындағы үштікке еркін кіретінін ескеруміз керек. Алматы экономикасының өзіндік ерекшелігі бар. Мәселен, республикамыздың 14 облысындағы экономикалық көрсеткіштердің өзегін ауыл шаруашылығы мен өндіріс көздері құрайтын болса, Алматыда қызмет көрсету жүйесі, төлемдер жүйесі, айырбас-брокерлік жүйе жақсы жолға қойылған. Бұл қаладағы шағын бизнес көзінің дамуына даңғыл жол ашылғандығын білдіреді. Мұның сыртында өнім өндіруші және өңдеуші қуатты кәсіпорындардың үлес салмағы бар. Еліміз бойынша өндірістік салада тоқтаусыз жұмыс жасап, отандық нарыққа берік орныққан жүз жиырмадан астам шағын және ірі кәсіпорындар Алматы бюджетінің негізгі салымшылары санатында екен. Сондай-ақ, қаланың қаржы қоржынын қампайтып отырған салық төлеушілердің 65 пайызын шағын және орта бизнес өкілдері құрайды. Ал, биылғы жылдың артта қалған алты айындағы жағдай бойынша Алматының жалпы бюджеті 278 млрд 737,3 млн теңгені құрап, орындалуы жағынан 131 пайызға жеткен.
Астанадағы сияқты Алматы тұрғындарының да тұтыну қабілеті жоғары. Аймақтармен тауарлы-мәдени байланыс бір арнаға түскен. Мәселен, биылғы күз бойына Алатау бөктерінде де жәрмеңкелер жиі өтті. Әсіресе, қаламен қоңсылас жатқан Алматы және Жамбыл облыстарының өнімдері алматылықтар үшін әрдайым қолжетімді болды. Мысалға, Тараздан кіре тартып келген керуен бір базарда ғана алматылық ағайындарға 240 тоннаға жуық ауылшаруашылық тауарларын ұсынған. Шаруалар осы сапардан 112 млн теңгеден астам қаржыға сауда-саттық жасап қайтыпты. Сол сияқты, Алматы облысының тауар өндірушілері де 360 тоннадан астам азық-түлік саудалаған. Осылайша, жетісулық диқан-шаруалар бір күндік жәрмеңкеде жалпы құны 180 млн теңге пайда көрген екен. Осы екі мысалдың өзі Алматы қаласының қуатты өңірлер арасындағы салмағын айғақтаса керек.
Жалпы, еліміздің әр аймағы ішкі өндірісі мен ауыл шаруашылығы саласын өркендету арқылы табысын еселеп отыр. Өңірлердегі қуатты экономиканың өзегі бюджеттік түсімнің негізін құраушы фактор ғана емес, еңбек нарығындағы ахуалды да оң бағытта шешіп отырғандығын айғақтайды. Бұл дегеніңіз, әлеуметтік саясаттың жанды жері екені ақиқат. Демек, өңірлердің өркендеуі – байтақ Қазақстанның мәртебесі! Астана мен Алматыға қарап бой түзеген аймақтардың әркез даму биігінен көріне берері күмәнсіз.
Қалмаханбет МҰҚАМЕТҚАЛИ,
«Егемен Қазақстан»