Ақтауда тұрғын үй пайдалануға берілді

Тәуелсіздік жылдарында Маңғыстау облысының тұрғындары саны екі есе өсіп, 340 мыңнан 638 мыңға жетті. 25 жыл ішінде облыста 6,3 млн. шаршы метр баспана берілген. Тәуелсіздіктің алғашқы жылдарында жылына 116 шаршы метр баспана берілсе, биылғы жылы бұл көрсеткіш 5 есе артып, 645 мың шаршы метрге жеткен.   Ақтау қаласының 32 «а» шағынауданынан «Аймақты дамытудың 2020 жылға дейінгі» бағдарламасы аясында жергілікті бюджет қаражатына салынған екі көппәтерлі тұрғын үй пайдалануға берілді. Тәуелсіздіктің 25 жылдығы мерекесі қарсаңында баспаналы болғандар қатарында жетім балалар мен ата-анасының қамқорлығынсыз қалған балалар бар. Қазіргі таңда Ақтау қаласында тұрғын үйдің кезегінде 5 мың адам тұр. Олардың 2 мыңнан астамы әлеуметтік жағынан аз қамтылған отбасыларға жатады. Ал 500-ден астамы - жетім және ата-анасының қамқорлығынсыз қалған балалар. Гүлайым ШЫНТЕМІРҚЫЗЫ, «Егемен Қазақстан»