«Қазпошта» Алматыда өтетін Универсиаданы мәңгілік есте қалдыру мақсатында арнайы пошталық маркалар шығарып отыр. Осыған орай «Алматы Арена» ғимаратында салтанатты түрде маркаларға мөр басылды. Сондай-ақ, «EMS-Kazpost» 2017 жылғы Универсиаданың ресми курьері деп танылды.
Маркаға мөр басу салтанатында Алматы қаласындағы 2017 жылғы XXVIII Дүниежүзілік қысқы Универсиаданы ұйымдастыру және өткізу дирекциясының жетекшісі Наиль Нуров пен «Қазпошта» АҚ «EMS-Kazpost» филиалының директоры Еркінбек Дускужанов мәмілеге келіп, қол алысты.
– Біз енді Универсиаданың ресми курьері – «Қазпошта» АҚ-тың «EMS-Kazpost» филиалы болғанын қуана хабарлаймыз. Дирекциямыздың хат-хабарларын әлемнің әр түкпіріне және өз еліміздің кез келген тұрғылықты мекеніне жедел жеткізе алатын компанияны таңдау біз үшін өте маңызды. Біздің талаптарымызға «EMS-Kazpost» толығымен сәйкес келеді. Сонымен қатар, бұл компания эстафета алауына керекті ірі көлемдегі жүкті де тасымалдайды. Ал Универсиаданың құрметіне марка шығару – бұл шараның ел тарихындағы маңыздылығын көрсетеді, – деді Наиль Нуров.
Өз кезегінде «Казпоштаның» «EMS-Kazpost» филиалы да Универсиаданың ресми курьері болу ұсынысын қуана қабылдаған.
– Осы серіктестік барысында біздер шет мемлекеттерге мыңнан астам сәлемдемелерді жеткіземіз, ал Қазақстан бойынша 10 тонна шамасындағы ірі көлемдегі жүк тасымалдаймыз. Сонымен қатар, біз тауарлар мен басқа да құндылықтарды сақтауға арналған 500 шаршы метрлік қойманы пайдалануға береміз, – дейді «Казпошта» АҚ «EMS-Kazpost» филиалының директоры Еркінбек Дускужанов.
«Алматы қаласындағы 2017 жылғы ХХVIII Дүниежүзілік қысқы Универсиада» тақырыбындағы «Спорт» топтамасындағы пошталық блоктың маркасы 4 бояулы офсетті тәсілмен басылған, перфорациясы жақтаулы. Блоктың өлшемі 90 х 100 мм. Марканың өлшемі 28 х 40 мм. Таралымы – 7 500 блок. Суретші К.Плужникова. Белгіленген бағасы 300 теңге. Пошталық маркалар «Қазақстан Республикасы Ұлттық Банкінің Банкнот Фабрикасы» Республикалық мемлекеттік кәсіпорнында басып шығарылды.
Айнаш ЕСАЛИ,
«Егемен Қазақстан»