Тәуелсіз еліміздің жігерлі, білімді жастарын тәрбиелеу – ұстаздардың басты парызы. Ұстаздар қауымы бұл орайда өздеріне жүктелген міндетті абыроймен атқарып жүр.
Мен Бейнеу политехникалық колледжінде 2004 жылдан бері жұмыс жасап келемін. Жас буынға техникалық мамандықтар бойынша тек білім беріп қана қоймай, олардың колледж қабырғасында жүріп-ақ тәжірибе жинап, мамандығына қатысты құралдармен ерте бастан шұғылданғаны жөн деп есептеймін және мұндай мүмкіндіктің жастардың өз мамандығын тезірек меңгеріп кетуіне берер әсері көп.
Мемлекет басшысы Н.Назарбаевтың «Қазіргі заманда жастарға ақпараттық технологиямен байланысты әлемдік стандартқа сай мүдделі жаңа білім беру өте қажет», деген тапсырмасын өзім сабақ беретін «Есептеу техникасы және бағдарламалық қамтамасыздандыру» мамандығында тұрақты негізге алып келемін.
Білім беру – күрделі іс. Ақпараттық технология заманында жастарды қарапайым сабақ беру әдіс-тәсілдерімен қызықтыру мүмкін емес. Сондықтан, білікті мамандардың іс-тәжірибесіне сүйене отырып және оны одан әрі дамыта еңбек ету қажет. Бұл ұстаздан жан-жақтылықты, талмай ізденуді талап етеді. Әсіресе, ауылдық жерлердегі білім беру ұйымдарының жағдайы ұстазға жүктелер міндеттің салмағын екі еселей түседі. Қолда барды ұқсатып, жоқтан бар жасап жұмыс істеу керектігін ұғындық. Осы оймен 2006 жылдан бастап үш курста оқытылатын барлық мәліметтер жинақталған электронды оқулықтар құрастырып шығардық, қазір ол оқулықтар колледж студенттеріне қызмет етуде. Колледжде ғимаратты бақылауға, мұғалімдерге виртуальды түрде сабақтарға қатысып өзара тәжірибе алмасуы үшін бейнекамералар орналастырдық.
Шалғай ауылдарда жастарды өндіріс орындарына тұрақты апарып, өндіріс алаңдарында құрал-жабдықтармен жұмыс жасату мүмкіндігі шектеулі, әрі өндірістік қауіпсіздік мәселесі тұрғысынан қойылатын талаптар да істі жүзеге асыруға оңтайлы бола бермейді. Сондықтан өндірістік жабдықтардың қолжетімділігін арттыру мақсатында колледж қабырғасында «Beyneu Software» атты шығармашылық топ құрып, симулятор-тренажёрлар жасауды қолға алдық. Нәтижесінде, «Мұнай және газ ісі», «Автокөлік құрылысы» мамандықтары бойынша мультимедиалық электронды оқулық жасап шықтық және «Тепловоз машинисі», «Мұнай және газ кен орындарын пайдалану» және «Мұнайды қайта өңдеу технологиясы» мамандықтарына арналған оқу-жаттығу симулятор-тренажерлар дайындап шығардық. Шағын макеттерді пайдаланып білім алған оқушыларымыз Маңғыстау облысының білім беруді ақпараттандыру оқу-әдістемелік орталығының «Ең үздік веб-сайт» байқауының бірнеше дүркін жеңімпаздары атанды.
Колледжімізде Бейнеу ауданын суландыру мақсатында салынып жатқан су тұндыру стансасына қажетті мамандар қысқа мерзімді курстарда білім алуда. Оқу жылының соңына дейін су мамандарына арналған интерактивті макет дайындауды мақсат еттік. Іс-тәжірибеміз облыс көлемінде таратылып, біз дайындаған макеттер бірнеше көрмеге қойылды.
Тәжірибе алмасу, өз білгеніңді өзгелермен бөлісу, өзге әріптестерден үйрену – мұғалімдік қызметтің ең басты шарты. Осы орайда түрлі деңгейдегі семинарларға қатысып, тәжірибе алмасып келеміз. 2012 жылы Германияның Хамельн қаласындағы Ойген Райнтьеса және сауда-саттық мектептерінде еліміздегі кәсіптік және техникалық білім саласына дуалды оқыту жүйесін енгізу мақсатында ұйымдастырылған тағлымдамадан өттім. Білім беру саласындағы жұмысым елеусіз қалған жоқ. Облыстық, республикалық дәрежедегі түрлі марапаттарға қол жеткізіп, биыл Білім және ғылым министрлігі тарапынан «Үздік педагог-2016» жүлдесіне ие болдым.
Марапат алу да, оны тізбелеп айту да мақсат емес, ерінбей еңбек етсең, оны елейтін елің бар екендігін айту – мақсат. Ұстаздық қызметтің қызығы мен қиындығын қатар көтеріп, еліміздің ертеңін дайындау жолында ізденіспен еңбек ете беретін боламыз.
Тұрлан ОСПАНОВ,
Бейнеу политехникалық колледжінің
жоғары санатты арнайы пән мұғалімі
Маңғыстау облысы,
Бейнеу ауданы