Қазақстандағы білім беру жүйесінде білім сапасын өзгертудің өзекті мәселелерінің бірі – жалпы білім беретін мектептерде жаңартылған білім беру бағдарламасын енгізу. Жаңартылған білім беру бағдарламасы – заман талабына сай келешек ұрпақтың жан-жақты құзыреттілігін қалыптастыратын бағдарлама. Бұл бағдарламаның география пәнін оқытудағы басты ерекшелігі – білімді функциялық және шығармашылықпен қолдану, зерттеу жұмыстарын жүргізу, ақпараттық-коммуникациялық технологияларды қолдана отырып, деректер базасын өңдеу, жинақтау, топтастыру және түрлі формада ұсыну (мысалы инфографика, картограмма, картодиограмма, Exsell бағдарламасындағы түрлі кестелер мен диаграммалар), коммуникативті қарым-қатынас дамытуда тілдік дағдыларын (оқылым, жазылым, айтылым, тыңдалым) қалыптастыру, бір сөзбен айтқанда, ХХІ ғасырда қажетті кең ауқымды дағдыларды дамыту. Бұл дағдыларды оқушы бойына қалыптастыру үшін, мұғалімнің бойында да осы дағдылар болуы шарт, яғни мұғалім оқушылармен шығармашылық қарым-қатынаста болуы тиіс.
«География» пәні бойынша оқу бағдарламасының мақсаты – дүниенің географиялық бейнесін тұтас қабылдайтын, географиялық ойлау қабілеті дамыған, осы пәннің әдістері мен тілін білетін және қолданатын, географиялық мәдениеті бар тұлға тәрбиелеу.
«География» пәнінен жаңартылған оқу бағдарламасында төмендегідей ерекшеліктер көрініс алады. Олар: дағды мен білімдердің бір мақсатқа бірігуі, яғни оқу мақсатына дағдылар арқылы жету, зерттеу әдістері негізінде әмбебап мақсаттардың әр тақырыптарда көрініс алуы, мысалы, далалық, картографиялық әдістер т.б, танымдық әрекет, яғни сыни тұрғыдан ойлауға байланысты белсенді әдістер арқылы оқыту, пайдалануға болатын ресурстардың әртүрлілігі, әр сабақтың практикалық бағыты, сондай-ақ, тілдік мақсаттар, яғни тілдік дағдыны дамыту мақсатында тілдік 4 дағды оқу жоспарында бір-бірімен өте тығыз байланысқандығы, оқушының өз ойын, пікірін, көзқарасын түрлі мысалдар арқылы жеткізе білуі, пән мазмұнының спиральді қағидатпен берілуі, яғни тақырыптар жыл бойы қайталанып отырғанымен, сынып өскен сайын күрделеніп отыруы.
«География» пәні бойынша ұсынылған тақырыптар, пәнаралық байланыстарды жүзеге асыру жергілікті компоненттер негізінде берілген, соның барысында оқушының бойына ұлттық құндылықтармен бірге азаматтық жауапкершілік, құрмет, ынтымақтастық сынды қасиеттерді қалыптастыруға жағдай жасалады. Ашық ақпараттық кеңістікте қажетті ресурстарды қолдануда ұлттық құндылықтарды бала бойына сіңіру үшін жергілікті компоненттер негізінде оқытудың маңыздылығы зор.
Жаңартылған оқу бағдарламасында оқушының білім жетістігін шынайы бағалау үшін критерилі бағалаудың енгізілуі де орынды, себебі, ол мұғалімдерді нақтылыққа машықтандыратын, оқушылардың құзыреттілігінің қалыптасуына және жеке тұлғаның қалыптасуына мүмкіндік беретін бірден-бір жүйе, мұндағы бағалау мақсатқа жету үшін алдын ала белгіленген жетістік критерилері арқылы жүргізіледі.
Оқу бағдарламасының тағы бір жеңілдігі, нақты бір тақырып ұсынылмайды, берілген 6 тарау: географиялық зерттеу әдістері, картография және географиялық деректер базасы, физикалық география, әлеуметтік география, экономикалық география, елтану және саяси география негізінде мұғалім өзінің кәсіби біліктілігі мен шығармашылығына қарай және уақыт талабына сай тақырыптар таңдап алады, яғни толығымен мұғалімнің автономиясы сақталған. Бұдан әр мұғалімнің өздігінен үздіксіз білім алуы жүзеге асырылады, соның барысында кәсіби шеберлігі шыңдалады.
Қазіргі заман талабына сай әр мұғалімнің ақпараттық коммуникативті технологиялармен жұмыс жасау барысы жоғары деңгейде болуы тиіс. Сондықтан оқу бағдарламасының «Зерттеу және зерттеушілер», «Географиялық карталар», «Географиялық деректер базасы» тарауларының оқу мақсаттары АКТ қолдануды тікелей талап етеді, атап айтсақ, интернетті қолдана отырып ақпараттарды іздеу, талдау, өңдеу, жинақтау, электронды кестелер мен графикалық қосымшаларды қолданып, деректермен жұмыс жасау, PowerPoint бағдарламасы арқылы түрлі тұсаукесерлер даярлап, оны сынып алдында қорғау, интербелсенді тақтаның мүмкіндіктерін пайдалану. Бұл өз кезегінде оқушымен қатар мұғалімге де ақпараттық құзыреттіліктерін дамытуға бірден-бір себеп.
Сөзімді қорыта келе, жаңартылған бағдарламаны оқыту жүйесіне енгізу арқылы оқушыға дайын білімді бермей, білімді өздігінен меңгеруіне жағдай жасаймыз, соның барысында жан-жақты ізденетін, әр күнін болжай алатын, алған білімін өмірде қолдана алатын тұлға тәрбиелейміз, ол біз үшін зор мүмкіндік және оны тиянақты жүзеге асыру мұғалімнің шеберлігіне байланысты деп білемін.
Марал ЖҮНІСБАЕВА,
Физика-математика
бағытындағы Назарбаев зияткерлік мектебінің география пәнінің мұғалімі
Астана