Жиырма бес жыл. Өркениет құндылықтарының қақтығысы мен геосаяси аласапыранды, ақтап алуға болмайтын, мағынасыз қантөгістер мен идеологиялық, діни қайшылықтарды, радикализм мен терроризмді, экономикалық, қаржылық катаклизмдер мен технологиялық революцияларды жарыса басынан кешірген ширек ғасыр. Өркениет қана емес, мемлекет, қоғам, адамдар мен аксиомалар тарих тезіне салынған, сұрыпталған, екшелген алмағайып уақыт.
Осы бір өлара кезең Қазақстан үшін де, қазақ халқы үшін де өткел берместей күдік, күмәнмен басталғаны есімізде. Бақытымызға қарай, елді абыржытып, алаңдатқан күдік-күмәннің аяғы мемлекет, ұлт болашағының жарқындығына, кемелдігіне деген үкілі үмітке ұласты. Ширек ғасыр өткен соң үмітіміз айнымас, мызғымас ұлы сенімге, ұлы мұратқа айналды.
1991 жылғы 16 желтоқсанда «Қазақстан Республикасының Мемлекеттік тәуелсіздігі туралы» Конституциялық заң қабылданды. Ұлы Дала елінің күні туды, дәуірі келді. Мыңдаған жылдық тағдыр-талайы бар халық тарих сахнасына қайта шықты. Өзіне ғана лайықты, өзіне ғана тиесілі төлтума болмысын, мәңгілік бастауын қайта тапты. Бұл, өңіміз түгілі түсімізге кірмеген, ата-бабаларымыздың аманаты, арман-аңсары қалыбында ғана өмір сүрген, мүлде тосын, мүлде жаңа мемлекет – Тәуелсіз Қазақстан болатын.
Өткенге көз жүгіртсек, Қазақстанның бүгінгі бейбіт те бақуатты заманға жету жолы – даму, гүлдену жолы даңғыл болмағанын көреміз. Тіпті, 90-жылдардың басында «тәуелсіз мемлекет болудан гөрі, тәуелсіз мемлекет болмай қалудың» алғышарттары басым түсіп жатқан. Бұл Кеңес Одағы ыдырағаннан кейінгі хаос пен үрейге толы географиялық кеңістіктегі, барлық жас мемлекеттердің басындағы ауыр жағдай еді.
Шындығында, ол уақытта ешкімнің жағдайы кісі қызығарлықтай емес-тін. Мемлекеттік басқару институттарының дәрменсіздігі, кеңестік шаруашылық пен экономиканы жүргізу тәсілдерінің ескіруі, бюджеттік жүйенің теңгерімсіздігі, өнеркәсіп, өндіріс саласының тұралауы, әлемдік нарықтағы шикізат бағасының тұрақсыздығы, сыртқы сауда конъюнктурасының жайсыздығы және т.б. факторлар посткеңестік елдерде бұрын-соңды болмаған үмітсіздікке, белгісіздікке, жаппай әлеуметтік апатияға әкеліп соқтырды. Кейбір республикалардағы ахуал тіпті, адам шошырлық болатын, мемлекет басындағы саяси элитаның өресіздігінің, бақастығы мен көрсоқырлығының кесірінен тұтас халықтар ұлтаралық қақтығыстардың, азамат соғысының отына шарпылып жатты.
«Балапан басымен, тұрымтай тұсымен» дейтін заман басталды. Барлығының таңдауы нарықтық трансформация болғанымен, олардың саяси, экономикалық даму үлгілері, оның іс жүзіне асырылуы мен нәтижесі әрқилы болып шықты. Қазақстан өз Тәуелсіздігін осындай екіұдай, аумалы-төкпелі шақта жария етті. Қазақстанның Тұңғыш Президенті Нұрсұлтан Әбішұлы Назарбаевтың алдында дербес, жаңа мемлекет құру мақсаты тұрды.
«Бұрынғы Кеңес Одағы бет-бейнесін түбегейлі өзгерткен оқиғалар тарих еншісіне айналды. Бүгінде өз тағдырын өзі айқындаған қазақ ұлтының жас егеменді мемлекеті, Қазақстанның бүкіл халқы мен экономикасы өзінің жаңа жай-күйінің жолында тұр.
Қоғамдық организм, онда орын алған саяси және экономикалық қатынастар өзгеру үстінде. Қоғам мен экономика барған сайын ашық сипатқа ие болуда. Демократияның дамуы, меншікті қатынастарды реформалау және толыққанды жүйелі нарыққа қадам жасау экономиканы дағдарыстан шығарудың баламасыз құралы ретінде танылды, ұлттық мемлекеттің қалыптасуы үшін қолайлы жағдай жасауда.
Қазақстанды біз үшін басқа ешкім де өзгертпейтінін, дүние жүзі қауымдастығында оған лайықты орын алып бермейтінін, біздің өміріміздің стандартын жоғары көтермейтінін түсіну маңызды. Барлық қазақстандықтар ілгерілеудің концептуалдық бағытын көрмейінше, алыстағы мақсатты түсінбейінше, олардың стратегиялық байланысындағы нақты бағдарламалық қадамдарсыз ол бос сөз болып қала беретініне сенімдімін».
Ел Президентінің 1992 жылы жазылған «Қазақстанның егеменді мемлекет ретінде қалыптасуы мен дамуының стратегиясы» еңбегі осылай басталады. Көреген көзқарас, ауқымды дүниетаным, нақпа-нақ мақсаттар. Расында, Елбасының 90-жылдардың өзінде-ақ Тәуелсіз Қазақстанның он жылдықтардағы, ширек ғасыр көлеміндегі өсіп-өркендеу жолын зерделеп, нақтылап бергені таң қалдырмай қоймайды. Меніңше, аталған стратегиялық еңбек Қазақстандағы барлық реформалардың, жаңарып, жаңғырулардың бастауында тұр.
Мемлекет Тәуелсіздік туралы декларация жариялаған күннің ертесінде-ақ қоғамдық өмірдің барлық саласында жүйелі жаңғыртуларды іске асыру, саяси, әкімшілік, экономикалық құрылымды түбегейлі өзгерту, жаңарту ісін қолға алды. Бұл үшін бір адамның қажыр-қайраты аздық ететін, бүкіл халықтың жұдырықтай жұмылған бірлігі, ерік-жігері мен қапысыз таңдауы қажет болатын.
90-жылдардың басында, жас мемлекеттің күн тәртібінде, бірінші кезекте халықаралық қоғамдастықтан өзінің лайықты орнын алу мәселесі тұрды. Дәл осы тұста тарих сахнасына шыққан жас та тәуелсіз Қазақстанмен бірге оның тұңғыш Президенті Нұрсұлтан Назарбаевтың жұлдызы да әлемдік саясат көгінде жарқырай көрінген еді. Қазақстанның көпвекторлы, прагматикалық саясаты, алғашқы күннен-ақ жария етілген интеграциялық бастамалары жаппай қолдау тапты. Ел басшылығының гуманизм мен ізгілік қағидаларынан ауытқымауға шақырған үндеулерін әлем жұртшылығы естіді, мақұлдады.
Қазақстан ядролық қарусыз әлем қозғалысының көшбасшысына айналды. Семей ядролық полигонын жабу тарихқа «Бейбітшілік миссиясы» ретінде енді. Бұл қадам туралы БҰҰ Бас хатшысы Кофи Аннан: «Қазақстан – өзге ТМД елдерімен салыстырғанда ерекше мемлекет. Онда тұрақтылық, бейбітшілік және экономикалық өсім бар. 1991 жылы Президент Назарбаевтың бастамасымен Қазақстан өз еркімен ядролық қарудан бас тартқанда, біз Назарбаевтың осы бір бастамасына қайран қалған болатынбыз. Өйткені, БҰҰ әлем елдерін ядродан бас тартуға үндеп келе жатқанына 60 жылдан асты. Бірақ нәтиже жоқ еді. Мұның бәрі Президент Назарбаевтың еңбегі», деп лайықты бағасын береді. Осы пікірлердің дәлеліндей, БҰҰ Бас Ассамблеясы тарапынан «29 тамыз – Ядролық сынақтарға қарсы іс-қимылдың халықаралық күні» болып белгіленді.
Мемлекет басшысының ғұлама білім-білігі, өлшеусіз тәжірибесі мен қайраткер болмысы әлем алпауыттарының өзін еріксіз сыйлатуға, санасуға мәжбүрледі. Джордж Буш, Маргарет Тэтчер, Ли Куан Ю, Нельсон Мандела сияқты беделді мемлекет басшылары Нұрсұлтан Назарбаевтың қайраткерлік, көшбасшылық қасиетін жоғары бағалады. Ұлыбританияның сол кездегі әлемге мәшһүр премьер-министрі Маргарет Тэтчер: «Қазір жаһандық саясатта 5-6 ірі саяси ойыншы бар. Солардың бірі – Нұрсұлтан Назарбаев. Мен оған қатты сенемін және оның бастамаларын қолдаймын», деген болатын. Бұл бұрынғы кеңестік кеңістікте саясаткер Назарбаевқа тең келер тұлғаның жоқтығын әйгілейтін риясыз лебіз еді.
Қазақстан әрдайым Шығыс пен Батыс, өркениеттер мен діндер, конфессиялар арасына, түрлі саяси маңызды бастамаларға дәнекерлік жасап келеді. Бүгінде әлемдік, халықаралық саяси, қаржылық ұйымдардың беделді әріптесіміз, БҰҰ, ЕҚЫҰ, ТМД, Еуразиялық одақ, Азиядағы өзара іс-қимыл және сенім шаралары жөніндегі кеңес, Шанхай ынтымақтастық ұйымдары секілді белді әлемдік құрылымдардың мүшесіміз. Біздің ел ұстанған көпвекторлы саясат қағидасы барлық мемлекеттер мен халықаралық ұйымдар тарапынан түсіністік пен құрметке ие болып отыр.
Қазақстанның елордасы Астанада Еуропадағы қауіпсіздік және ынтымақтастық ұйымы саммитінің, Әлемдік және дәстүрлі діндер көшбасшылары съездерінің, Иранның ядролық бағдарламасы бойынша келіссөз комиссиясы отырысының өткізілуі, келесі жылы жоғары деңгейде ұйымдастырылатын ЭКСПО-2017 көрмесі – мұның барлығы да Қазақстан дипломатиясының сыртқы саясаттағы беделі мен жетістіктерінің көрінісі. Жақында Қазақстанның Біріккен Ұлттар Ұйымы Қауіпсіздік Кеңесінің тұрақты емес мүшесі болып сайлануы да соның бір жарқын дәлелі.
Қазақстанның әлемдік ауқымдағы бет-беделін аспандата көтерген ұлы жобасы – жаңа Астанасы болғанын біз бүгінде мақтанышпен айтамыз. Астана бұл күнде Тәуелсіз мемлекеттің темірқазығы ғана емес, Қазақстанның бүкіл жеткен жетістіктері мен табыстарының айғағы, мүмкіндіктерінің көрінісі. Елорда аз ғана уақыттың ішінде еліміздің саяси, қаржылық, рухани орталығына, болашаққа ұмтылған көпұлтты, мемлекеттегі оң өзгерістердің, бірлік пен берекенің символына айналды.
Астананың ғана емес, мемлекеттің Бас архитекторы Нұрсұлтан Назарбаев Мәңгілік Ел үшін Арқа төсінде мәңгілік ескерткіш орнатты. Астананың арқа төсіне ауысуы алаш баласының 90-жылдардағы күдік-күмәніне нүкте қойғаны, үркек көңілін сейілткені, үмітін оятып, сенімін нықтағаны ақиқат.
Н.Назарбаевтың асқан сауаттылықпен, кемелдікпен жүргізген сыртқы саясаты елдің ішкі ахуалының орнығуымен, әл-ауқатының жақсаруымен үнемі біте қайнасып жатқанын атап айтуға тиіспіз. Осы жылдар ішінде, қандай қиыншылық болмасын, Қазақстан билігі әлеуметтік пішіндегі мемлекет құру бағдарынан ауытқыған жоқ.
Елбасы ұстанған «алдымен – экономика, содан кейін саясат» қағидасы өзінің өміршеңдігін дәлелдеді. Бұл ұстанымның екінші аты – тұрақтылық және үздіксіз жаңару, даму.
Меніңше, Қазақстанда іске асырылып жатқан реформалардың негізінде мынадай екі бастау жатыр. Мұның алғашқысы – мемлекет құрылысының, қоғамдық өмірдің барлық саласында жаңашылдықты, инновацияны алдыңғы орынға қою болса, екіншісі – барлық бағыттағы қозғалыста эволюциялық, өміршеңдік қағидаларға басымдық беріп отыру.
Тәуелсіздіктің алғашқы жылдарында-ақ Елбасы: «Өзге елдер бізге демократиялық спринт үшін қол шапалақтасын деп біз өз халқымызға эксперимент жасай алмаймыз», деп ашық мәлімдеген болатын. Мемлекет басшысының осы батылдығы мен тәуекелшілдігі, тәжірибесі мен біліктілігі, халықшылдығы мен сұңғылалығы жұрттың жаппай қолдауы мен сүйіспеншілігін туғызды. Бұл сүйіспеншілік алдағы күнге деген үміт пен сенімге ұласты. Және ол сенім әлі сетінеген жоқ. Керісінше, жылдар өткен сайын бекіп, зорайып келеді.
Бұл сенімді Қазақстанға жиі келетін әлемдік деңгейдегі, беделді сарапшылардың, саясаткерлердің ой-пікірлері одан әрі бекемдей түседі. Осыдан біраз бұрын әлемдік деңгейдегі бизнес-консультант, бизнес үдерістерін басқарудың теңдессіз маманы, доктор Ицках Калдерон Адизес Қазақстанға келді. Реті келген ілкі кездесулердің бірінде доктор Адизес айтқан мына бір шынайы тұжырым есімде қалыпты: «Қазақстанның үздіксіз, табысты дамуы үшін барлық мүмкіндіктері бар. Бұл елдің басшылығы да, халқы да жаңа серпілістерге, өзгерістерге дайын екеніне көзім анық жетті. Шыны керек, мен Қазақстанды да, қазақстандықтарды да қатты ұнатып қалдым. Кейде өзім де осы өзгерістер бастамасының бір бөлшегі болғым келеді. Сіздердің көздеген мақсаттарыңызға жететіндеріңізге мен кәміл сенемін», деген еді ол. Бұл да біздің елімізде қолға алынған игілікті бастамаларға берілген әділ баға болатын.
Тәуелсіздік жылдары елде экономикалық, әлеуметтік ахуалды оңалтуға бағытталған батыл қадамдар жасалды. Аз ғана уақыттың ішінде ел экономикасына шетелдік инвестициялар тартылды. Қысқа мерзімде, пәрменді түрде жүргізілген жекешелендіру үдерісінің арқасында ішкі нарыққа халықаралық, трансұлттық компаниялар орасан қаржы салды, отандық өнеркәсіп пен шағын және орта бизнеске жан бітті. Қазақстан ТМД елдері арасында тікелей шетелдік инвестиция тартқан озық елге айналды. 1996-1997 жылдары Қазақстандағы өндіріс аяғынан тұрып, едәуір макроэкономикалық тұрақтылыққа қол жеткіздік.
Жалпы, халықаралық, отандық сарапшылардың пікірінше, 1991-1997 жылдар бұрынғы кеңестік мемлекеттер үшін экономикалық күйреу, құлдырау кезеңі саналады. Олар ғана емес, бұрынғы Варшава шарты шеңберіндегі мемлекеттердің көбі 2000-жылдардан кейін ғана ес жия бастағаны белгілі. Бұл тұрғыда Қазақстан олардан оқшау да озық тұр.
Ал әлемдік үрдістер мен үдерістерден бас тартқан кейбір көршілеріміз жылдар өте келе саяси, экономикалық іргетасы болбыр, әлеуеті әлсіз, елеусіз мемлекетке, тіпті, бәзбірі «жабық қоғамға» айналды. Өз ішінде халықтық, қоғамдық келісім мен тұрақтылықты сақтай алмай, ұлтаралық қақтығыс пен саяси алауыздыққа жол берген мемлекеттердің дамуы ондаған жылдарға кері шегерілді. Қазақстан әлеуметтік-экономикалық, саяси реформаларды жан-жақты ойластырып, кешенді әрі сауатты жүргізуінің арқасында ұзақ уақыт әлемде қарқынды дамып келе жатқан 5 елдің қатарында болды.
2000-2007 жылдары Қазақстан өз тарихындағы ең бір қарқынды, әлеуетті өсуге қол жеткізді. Осы кезеңде Қазақстан экономикасы орта есеппен 10% деңгейінде өсіп отырды. Салыстыру үшін, 1997 жылы жан басына шаққандағы ішкі жалпы өнім 1445 доллар болса, 2007 жылы 6800 долларға жетті. Тауар айналымы 5,4 есе, экспорт 6,6 есе өсті. Қазақстан уран, көмір, мұнай мен газ, астық өндіруде әлемдік жетекші мемлекеттердің қатарына енді.
Дүние үнемі өзгеріс үстінде. Жаңа ғасырдың екінші он жылдығы да жаңа сынақтар мен сыйларға толы болғанын көзіміз көріп отыр. Әлем экономикасын тұралатқан қаржы дағдарысы дамыған елдердің өзін есеңгіретіп кетті. Халықаралық нарықта шикізат бағасының төмендеуі біз үшін де оңай соққан жоқ. Мемлекет бюджетіндегі кейбір әлеуметтік маңызы төмен шығындарды қысқартып, Ұлттық қордағы қаржыны пайдалануға тура келді. Мемлекет қаржы саласын, екінші деңгейлі банктер мен бизнесті мейлінше қолдап бақты. Мұның өзі ел экономикасының тұрақтылығына, халықтың әл-ауқатының шектен тыс төмендеп кетпеуіне зор ықпалын тигізді. Осындай айтып келмейтін тәуекелдерге, тосыннан ұшырасқан қиындықтарға қарамастан, біз «Қазақстан-2030» Стратегиясында алға қойған міндеттерді мерзімінен бұрын еңсеруге қол жеткіздік.
Ең бастысы, мемлекет осы уақыт ішінде өзінің әлеуметтік ұстанымын еш өзгерткен емес. Он бес жылдың ішінде ұлттық экономиканың көлемі 1,7 триллионнан 28 триллион теңгеге, Қазақстандықтардың табысы 16 есеге өскен. 1997 жылдан бері республика бойынша 942 мектеп, сонымен қатар, 758 аурухана және өзге де денсаулық сақтау нысандары салынған.
Қазіргідей ауыр кезеңнің өзінде Қазақстан экономикасында сауығу, өсу белгілері байқалады. Мәселен, 2016 жылдың қаңтар-қыркүйек айларында ішкі жалпы өнім 0,4%-ға өскен. Осы уақыт аралығында құрылыс саласы 6,9%-ға, ауыл шаруашылығы 4,9%-ға, мал шаруашылығы 2,5%-ға, тауар өндіру 0,2%-ға, қызмет көрсету 0,4%-ға артып отыр. Инфляция қыркүйек айында 0,2%-ға ғана төмендеген.
Бұл – жай сандар шеруі емес, бұл – тұрмысы жақсарған, еңсесі көтерілген мемлекеттің бүгінгі бейнесі.
Жаңа ғасырдың екінші он жылдығында Елбасы Нұрсұлтан Назарбаев Тәуелсіз мемлекеттің алдындағы жаңа асулардың межесін белгіледі. Бұл тарихи құжат – «Қазақстан-2050» Стратегиясы еді. Елбасы бұл жолы тәуелсіздігіне кеше ғана қол жеткізіп, дамуға бет алған елдің емес, әбден толысып, қалыптасқан, аяғына нық тұрған мемлекеттің ұзақ мерзімді жоспарын түзіп берді.
Енді біздің алдымызда жаңа мақсат-міндеттер тұр. Елбасы ұсынған «Мәңгілік Ел» идеясымен ұштасатын «2050» Стратегиясын табысты жүзеге асыруды бастадық. Президент Жолдауында аталып өткендей, қалыптасқан мемлекеттің жаңа саяси бағытын айқындадық. Осы мақсаттың үдесінен шығу үшін Мемлекет басшысы мемлекеттілікті одан әрі дамыту және нығайту, экономикалық саясаттың жаңа қағидаттарына көшу, жаңа әлеуметтік үлгіні қалыптастыру, білім беру мен денсаулық сақтаудың қазіргі заманғы және тиімді жүйесін құру, мемлекеттік аппараттың жауапкершілігін арттыру, халықаралық және қорғаныс саясатының жаңа сын-қатерлеріне пара-пар саясат құру тәрізді қадау-қадау міндеттерді белгілеп берді.
Осының бәрі – Тәуелсіз Қазақстанның ширек ғасырлық тарихындағы қол жеткізген табыстары мен жетістіктерінің бір парасы ғана.
Бостандыққа, дербестікке жету арманының ел үшін қаншалықты «тар жол, тайғақ кешулі» болғанын, Елбасы үшін жауапкершілігі мен салмағы қаншалықты ауыр болғанын бүгін ғана, жиырма бес жыл өткен соң бағамдап, бағалап отырмыз.
Осындайда қазақтың құлагер ақыны Ілияс Жансүгіровтің:
«Өз ұлы, өз ерлерін ескермесе,
Ел, тегі, алсын қайдан кемеңгерді!» деген жүрекжарды жыр жолдары ойға оралады.
Ақиқат жолы әрдайым адастырмайды. Бүгінде елді, мемлекетті дамытудың «Назарбаевтық нұсқасы» өзінің өміршеңдігін көрсетіп отыр. Бұл кезең, бұл уақыт ел шежіресіне алтын әріптермен жазылып жатыр.
Таулар алыстаған сайын биіктейді. Уақыт пен тарих та. Тұлғалар да. Замана алмасып, енді бірер ұрпақ ауысқан тұста, Тәуелсіз Қазақстанның осы бір жиырма бес жылдық өмір тарихы Алтын дәуірге баланары ақиқат!
Ұлы мереке құтты болсын!