Ұлттық академиялық кітапханада Қазақстан халқы Ассамблеясының қолдауымен, публицист, ҚХА және Қазақстан Жазушылар одағының мүшесі Александр Тараковтың ел Тәуелсіздігінің 25 жылдығына арналған «Казахстанский характер» кітабының тұсаукесер рәсімі өтті.
Бұл кітапқа автордың белгілі тұлғалар туралы 20 шақты очеркі енген. Очерктерінде А.Тараков өмірдің қиын жағдайлары мен күрделі сынақтарына төтеп беріп қана қоймай, кәсіби шеберліктің шыңына шығып, үлкен нәтижелерге қол жеткізген қайсар адамдардың мінез-құлықтарын жан-жақты ашып көрсеткен.
«Бұл арнайы жазылып, жарыққа шыққан кітап емес. Ол – ұзақ жылғы еңбектің нәтижесі. Кітапта жазылған дүниелер, ондағы кейіпкерлер – Тәуелсіздіктің жемісі. Себебі, мен мұндағы кейіпкерлердің өсу, тұлғаға айналу жолдарын жан-жақты әрі терең бақылап, зерделеуге тырыстым. Жалпы алғанда, қазақстандықтардың күш-жігері мен мінез-құлықтары айрықша. Мен қалам тербеген бұл азаматтардың әрқайсысының өмір жолы жақсы қалыптасты, себебі, олар тек алға жылжу арқылы биік әрі жаңа шыңдарды бағындыра білді», – деді автордың өзі.
Парламент Мәжілісінің депутаты Сауытбек Абдрахманов: «Мен бір жолы тұсаукесер мен конференция бір-бірінен несімен ерекшеленеді деген сауалға қатысты өз ойымды білдірген едім. Конференцияда белгілі бір оқылған кітап туралы құнды ой айтылады, ал тұсаукесерде кітапты оқымай тұрып, оған мақтау сөз, жақсы пікір білдіріледі. Бірақ, бүгінгі жағдай мүлдем олай емес. Себебі, бәріміз де осы еңбекте жазылған дүниелерді оқып шыққанбыз. Олардың барлығы «Казахстанская правда» газетінің бетінде жарық көрді. Бәріміз де бұл басылымның оқырмандарымыз. Бәріміз де Александр Тараковтың шығармашылығымен жақсы, етене таныспыз. Бұл кітап өз уақытында жарық көріп отыр. Себебі, Президент Нұрсұлтан Назарбаев алдымызға Жалпыға Ортақ Еңбек Қоғамын құру туралы міндет қойып отыр. Ал бұл – еңбек және еңбек адамы туралы кітап және өте жақсы кітап», – деді.
Аталған еңбек туралы пікірін Қазақстан халқы Ассамблеясы кафедралары ассоциациясының төрағасы, экономика ғылымдарының докторы Анатолий Башмаков та білдірді. «Кез келген еңбектің оқырманға жол тартуы – әрқашан да айтулы оқиға. Ал мағыналы да мазмұнды еңбектің жарық көруі – ол мереке. Жақсы кітап – бұл жай ғана өнім емес, ол нағыз азаматтық іс-әрекет. Александр Тараковтың бұл дүниесінде оның ең таңдаулы ой-пайымдары, әдеби суреттемелері мен бейнелері, кейіпкерлердің өміріндегі кейбір сәттер сәтті көрініс тапқан», – деді ол.
Ал «Қоғамдық келісім» республикалық мемлекеттік бірлестігінің жетекшісі Наталья Калашникова: «Бүгін біз бұл кітапты Ұлттық академиялық кітапханаға, сондай-ақ, ұлтаралық және конфессияаралық қатынастар саласы бойынша қазақстандық авторлардың ғылыми еңбектері мен зерттеулерінің қорын қалыптастыру және насихаттау мақсатында құрылған Қазақстан халқы Ассамблеясы депозийтарийіне ресми түрде тапсыратын боламыз. Жалпы алғанда, бұл шығарма әлемнің 80-нен астам елінің 130 мыңға тарта оқырманынан тұратын аудиторияны қамтитын болады», – деді өз сөзінде.
Сонымен қатар, Қазақстан халқы Ассамблеясы Төрағасының орынбасары Ералы Тоғжанов ҚХА-ның бірқатар мүшесін, этномәдени бірлестіктер, ғылыми және шығармашылық зиялы қауым өкілдерін Қазақстан Республикасының мемлекеттік наградаларымен, «Қазақстан Республикасы Тәуелсіздігіне – 25 жыл» мерекелік медалімен, ҚХА-ның «Бірлік» алтын медалімен, ҚХА-ның Құрмет грамотасымен және Алғыс хатымен марапаттады.
Мәселен, Ядролық сынақтарға қарсы «Невада-Семей» халықаралық қозғалысының вице-президенті Сұлтан Картоев пен Батыс Қазақстан облысы Қазақстан халқы Ассамблеясы хатшылығының меңгерушісі Гайса Капаков «Парасат» орденімен, Қазақстан Республикасы Ұлттық музейінің аға ғылыми қызметкері Виктор Зайберт II дәрежелі «Достық» орденімен, Орал қалалық мәслихатының депутаты, ҚХА мүшесі Аветик Амирханян, «Динар-Электромаш» ЖШС меңгерушісі Сергей Вишняк және Алматы қаласындағы әзербайжан этномәдени бірлестігінің төрағасы Эйбаз Мамедгасанов «Құрмет» орденімен марапатталды.
«Ерен еңбегі үшін» медалін «Есік» мемлекеттік тарихи-мәдени қорық-музейінің директоры Гүлмира Мұхтарова алса, Жамбыл атындағы Қазақ мемлекеттік филармониясының мемлекеттік үрлемелі аспаптар оркестрінің солисі Игорь Благодарный «Қазақстанның еңбек сіңірген қайраткері» құрметті атағына ие болды.
Ләйла ЕДІЛҚЫЗЫ,
«Егемен Қазақстан»