Шымкенттің газ тарату желілері толықтай жаңартылды

Егемен ел болғанымызға ширек ғасыр толғанда, Тәуелсіздік күні мерекесі қарсаңында Шымкентте газ тарату желілерін қайта жөндеу мен жаңғыртудың кезекті сатысы аяқталып, ел игілігіне берілді. Осылайша Шымкент шаһарының бүкіл газ желілері сапасы жөнінен еліміздегі ең озық сатыға көтерілді. Аталған шараға облыс әкімі Жансейіт Түймебаев, «ҚазТрансГазАймақ» АҚ бас директорының бірінші орынбасары Ғалым Айдосовпен бірге бизнес құрылымдарының өкілдері де қатысты. Облыс басшысы өңірді көгілдір отынмен қамтамасыз ету жұмыстары жайына тоқталып, осы бағыттағы игі істердің жалғасын табуына тілектестік білдірді. – «ҚазТрансГаз» акционерлік қоғамы қазіргі таңда облыстағы 300 мың­ға жуық абонентті газбен қамту қызметін жүргізіп отыр. Аталған м­екеме кеңестік кезең кезінде салынып, тозығы жеткен құбырларды, қон­дырғыларды жаңарту арқылы ха­лыққа сапалы газ беру мақсатында соң­ғы 6 жылда 33 млрд теңге инвес­ти­циялық қаржыға «Шымкент қа­ла­сының газ тарату желілерін қайта құру мен жаңғырту» бағдарламасын жү­з­еге асырды. Құбырлар жер астымен жүргізілді. Бұл қала мен елді ме­кендердің көркін жақсарта түсті. Жал­пы бүгінге дейін инвестициялық қаражаттар есебінен 2 390 шақырым газ құбырлары жаңартылған. Нәти­же­сінде, 2017 жылдың 1 қаңтар­ы­на құ­бырлардың тозығы жетуі 2010 жылмен салыстыра есептесек, 60 пайыздан 19 пайызға төмендетілді, – деді Жансейіт Түймебаев. Мұнан бөлек, аймақ басшысы 2013 жылы Түр­кістан қаласына №15, 2015 жылы Бәйдібек, Созақ ау­дан­дарын газдандыруға №18 «Шалдар» авто­­ма­тты газ тарату стансаларының «ҚазТрансГаз» ак­цио­­нерлік қоғамы­ның қаражаты есебінен аяқталып, іске қосылғанын айтты. Нәтижесінде, бү­гін­­гі таңда Түр­кістан шаһары мен Шаян елді мекені газбен қам­тылып жа­тыр. Мұндай жүйелі жұмыстары үшін «ҚазТрансГаз» компаниясына алғыс білдіреміз, деді облыс әкімі. 2009-2016 жылдар аралығында бюджет есебінен елді мекендерді газдандыру саласына 65 млрд теңге қаражат жұмсалып, 203 елді мекенге көгілдір отын жетті. Ал биыл олардың қатарына 25 ауыл қосылып, облыс бойы­н­- ша жалпы қамтылған елді мекен саны 300-ге жетті. Бұл облыстағы елді мекендердің 35,5 пайызы. Жалпы алғанда, облыс тұрғындарының 1 миллион 755 мыңнан (61,8 пайыз) астамы көгілдір отынды тұтынуда. Ал «Бейнеу – Бозой – Шымкент» отандық магистралды газ құбыры бойындағы 8 ауданның 248 елді мекенін (684 304 халық) газдандыру мақсатында жоспарланған 7 автоматты газ тарату стансасының (АГТС) 4-уі іске қосылды. Қалған 3 АГТС құ­ры­лысын 2017 жылдың бірінші жар­тыжылдығына аяқтау жоспарла­нып отыр. Осыған орай, облысты газ­дандырудың 2021 жылға дейінгі іс-шарасы әзірленіп, 47 елді мекенді газ­дандырудың жобалық-сметалық құ­жаттамаларын әзірлеу жұмыстары бас­талып кетті. Келер жылы газдандыру ісінде бұдан бөлек жұмыстарға да қаржы қарау жоспарлануда. Жалпы, облыс елді мекендерін газ­дандырудың іс-шара жоспарына сәйкес, 2017-2020 жылдар аралығында 733 630 тұрғыны бар 383 ауылды газдандыру жоспарланған. Нәтижесінде 2020 жылдың соңына дейін 683 елді мекен көгілдір отынмен қамтылмақ. Бұл дегеніңіз – 2,5 млн халық, облыс тұрғындарының 89 пайызы. «ҚазТрансГаз Аймақ» АҚ бас директорының бірінші орынбасары Ғалым Айдосовтың айтуынша, газ құбырларын жаңғырту жоба­сын жүзеге асыру кезінде олар инно­ва­циялық технологияны барынша қолданған. Ең негізгісі – болат құ­бырлардан гөрі полиэтиленнен жа­сал­ған құбырларды төсеу әлдеқайда тиім­ді. – 2009 жылы басталған облыстағы газ тарату желісін жаңғырту бағдар­ла­масының нәтижесінде газбен қам­ту­дың техникалық базасы кеңейді. Болат құбырлар, пайдалану мерзімі әлде­қайда ұзақ әрі электрохимиялық қор­ғанысты қажет етпейтін полиэтилен­ге ауыстырылып жатыр. Бұл оларды жөндеуге кететін шығындарды едә­уір азайтады. Жобаны жүзеге асы­ру­дың тиімділігі – жүйенің газ өт­кі­зу мүмкіндігі сағатына 85 мың тек­ше метрден 258 мың текше метр­ге дейін көбейеді және жоғары қы­сымды газ құбырларын бірнеше рет шығыршықтау арқылы бүкіл жүйе­нің беріктігін күшейтеді. Өңірде жа­ңа газ инфрақұрылымы құрылды, то­зығы жеткен құбырлар полиэтилен құ­быр­лар­ға ауыстырылуда. Ескірген газ та­рату пункттерінің орнына блокты-жи­налмалы пункттер салынып жатыр, – деді Ғалым Айдосов. Бұл өз кезегінде газдандырудың инфр­а­құрылымын жаңалап қа­на қой­май, тұтынушылар мен жеткі­зу­ші­лер ара­сында сенімді байланыс орнатып, жаңа қатынас қалыптастыруға мүм­кін­дік беріп отыр. Асылбек ДОСАЛЫ