1996 жылдың 30 қаңтарында Қазақстан Республикасының бірінші шақырылған Парламентінің І сессиясы ашылды. Оған Елбасы Нұрсұлтан Әбішұлы Назарбаев қатысып, еліміздегі тұңғыш қос палаталы кәсіби Парламенттің алдында тұрған маңызды міндеттерді белгілеп берді. Бұл сәт Қазақстан парламентаризмінің тарихы жаңа сипатпен, жаңа дәстүрмен жалғасқан күн ретінде тарихымызда таңбаланды.
Бұл күн мен үшін де ерекше тарихи сәт болды. Елбасының ұсынысымен Сенат депутаттары мені бірауыздан Сенат Төрағасы етіп сайлады. Бұл өте жауапты міндет еді. Ел тарихында бұрын қос палаталы Парламент те, Сенат та болған жоқ. Тыңнан түрен салғанда қателіксіз болмайтыны анық, ал бірақ бізге қателесуге болмайтын еді. Сондықтан, маған жүктелген міндет – тәуелсіз еліміздің Парламентінің жұмысын талапқа сай жүргізу болды.
Парламенттің І сессиясының ашылуында Елбасы бірінші кезекте Сенаттың да, Мәжілістің де регламенттерін қабылдауды ұсынған болатын. Палаталардың регламенттері қабылданғаннан кейін ұйымдастыру мәселелері шешілді. Сөйтіп, біз заң жобаларымен жұмыс үдерістері белгіленіп, тиянақталғаннан кейін негізгі заң шығару жұмыстарын бастап кеттік.
Осы арада Сенаттың талқылауына алғаш түскен заңдар тұрғысында айта кетейін. Сол кезде біз «Қоғамдық бірлестіктер туралы», «Мемлекеттік емес ерікті зейнетақы қорлары туралы», «Авторлық құқық және сабақтас құқықтар туралы», сондай-ақ, «Табиғи және техногендік сипаттағы төтенше жағдайлар туралы» заңдарды талқыладық.
Шыны керек, сол кездері заң жобалары Мәжілісте қызу пікірсайыстарға арқау болып, демократияның бар болмысы жан-жақты көрініс тауып жатты. Осы арада Сенат пен Мәжілістің ортақ мүддені ойлап, өзара түсіністікпен жұмыс істей білгенін ерекше атап өткім келеді. Сенаттың тежемелік тұрғысында тепе-теңдікті сақтаудағы рөлі ойдағыдай жүзеге асырылды. Қос палаталы Парламент болғаннан кейін біздер Үкіметпен, құқық қорғау органдарымен, басқа да салалармен тіл табыса жұмыс істеу мәселесіне баса назар аудардық. Әсіресе, екі палатаның ынтымақтаса жұмыс істеуіне ерекше мән бердік. Негізінде өзара дауласудан ешкім ештеңе ұтпайтынын терең түсіндік. Өйткені, бір-бірімізбен айтысып жүріп, жағдайды шиеленістіріп, кейбір елдердегідей тым тереңге кетіп қалуымыз мүмкін еді. Оның салдарының қалай болатынын ұғындық.
Біздер ынтымақтаса нәтижелі жұмыс істеуден басқаға көңіл аудармағандықтан, екі палатаның ортасында ешқандай келіспеушілік болған жоқ. Үкіметпен де жағымсыз әңгімеге бармадық. Біз бұдан кейбір мәселелерде ұтылған да шығармыз. Бірақ, негізінен біз бірлікті, тыныштықты сақтап қалдық. Ал Кеңес Одағы құрамынан шыққан кейбір елдерде осындай түсіністікпен іс жүргізу болмағандықтан, өз жағдайларын ауырлатып алды. Тіпті, көп жыл азаматтық соғысқа тап келгені де болды. Өздерінше демократияны біз бастап орнатып жатырмыз деген бір үлкен көрші ел кейіннен біздің тәжірибемізге жүгінді. Содан кейін барып олардың жағдайы оңалды.
Қазір байыппен қарасақ, сол кездегі біздің бағытымыз дұрыс болған екен. Ешбір шатаққа жол бермедік. Бір-бірімізді сыйлап, құрметтей білдік. Өте мәдениетті жұмыс ұйымдастырдық. Үлкен жанжалдар кішкентай келіспеушіліктен туындап жататынын барынша түсіндік. Рас, сындар да айтылды. Дұрыс сынға құлақ түрдік, бұрысына мән бермедік. Біздің үлкен жетістігіміз сол болды. Біз қандай жетістік болса да, оны бәріміз бірге қол жеткізген табысымыз деп сөйледік. Міне, осындай тәсілдер біздерді оң бағытқа бастады. Ол өз кезегінде тыныштықтың сақталуына зор ықпалын тигізді. Бүгінгі халыққа біз осы еңбегімізбен мақтана аламыз.
Біздің бір-бірімізбен дауласып, жанжалдасып жатқанымызды қалаған адамдар да болды. Олар ішкі кеңестеріміз бен талқылауларымыздың барысынан хабарсыз болғандықтан, «бұлар өзара пікірталасқа бармай, мәселені қызу талқыламай, тек бас шұлғып, заңдарды оңды-солды қабылдай береді» деген мазмұндағы пікірге иек артып, бізді сынап жүрді. «Мейлі, сынай берсін, ол да керек шығар» деп ойлап, жұмысымызды жалғастыра бердік.
Шын мәнінде сыртқа көрінбеген, өзімізге мәлім ауыр жұмыстар атқарылды. Қызу талқылаулар, ортақ іс үшін болып тұратын шиеленісті пікірталастар жұмысымыздың ішкі қазанында қайнап жататын. Мәселен, Қылмыстық кодексті қабылдау қарсаңында өте ауқымды жұмыс жүргені есімде. Сенат Кодекске 800 өзгеріс енгізді. Оның әрқайсысының дұрыс не бұрыстығын дәлелдеу қажет екені белгілі. Ал оны дайындап әкелген тарап та өзінің ұстанымын қызғыштай қорғап бағатыны анық. Міне, осындай тайталас нәтижесінде Кодекске 800 өзгеріс енгізілді. Оны ұсынған жақ біздің енгізген өзгерістерімізбен келісті. Бұл бір ғана заңның төңірегіндегі әңгіме. Ал осындай қаншама заң қабылданғанын ойлап көріңіз. Осының өзі-ақ жұмысымыздың қандай деңгейде қарбаласты болғанын көрсетеді. Сондай-ақ, әлгі бізді сынаушыларға лайықты жауап бола алады.
Сонымен қатар, парламентаралық ынтымақтастықты нығайтуға да баса назар аударылды. Халықаралық қатынастар өрістеді. Бірде Сауд Арабиясына барған сапарда Корольмен кездесудің сәті түсті. Сол сапардың барысында қазіргі Сенат ғимаратын салуға қажетті қаржы мәселесі Сауд Арабиясы Королінің қолдауымен шешімін тапты.
Міне, қос палаталы Парламенттің алғашқы оң қадамдары осылайша сәтті басталды. Мұның барлығы ел абыройын асқақтату жолындағы игі істер еді.
Қорыта айтқанда, Тәуелсіздігіміздің 25 жылдығы құтты болсын! Мемлекет басшысы Нұрсұлтан Назарбаевтың жүргізіп отырған салиқалы саясаты халқымыздың игілігі үшін жалғасын таба берсін.
Өмірбек БАЙГЕЛДИ,
мемлекет және қоғам қайраткері,
Парламент Сенатының алғашқы төрағасы