Тілшінің қойын дәптерінен ақтарылған сыр
Қып-қызыл тысы 90-шы жылдарды еріксіз еске салып тұратын тілші блокнотының шимайға толы беттерін парақтай бастағаным сол еді, өткен жылдар, кеткен күндер, соққан сағаттар мен жылжыған минуттар көз алдымда бейнетаспадай тартылып, рет-ретімен сырғи жөнелді...
Ол кезде Ақорда – Алматыда. Еліміздің егемендігін мойындаған шет мемлекеттердің басшылары ел астанасына ат басын бұрып, бірінен соң бірі тоқтаусыз ағылып келіп жатты. Қойын дәптердің парақтарын аударып, шұқшиып қараған сайын Тәуелсіз мемлекетіміздің тәй-тәй басқан алғашқы адымы, өткен жолдары небір қызығына жетелеп, қай-қайдағыны, жай-жайдағыны еске түсірді...
«Ақорда. 13.ХІІ.93 – сағат 17:08... АҚШ вице-президенті Альберт Гор...». Бәрі көз алдымда – ұзын бойлы ақсары америкалық мейман жылы жымиып барша журналиске басын изеп, ишара жасады. Алматыға келіп жатқан аса мәртебелі меймандардың арасында алғаш рет қазақша тіл қатқан да осы Альберт Гор болатын. Тілмаштың алдын орап «Өте жақсы, өте жақсы... Рахмет» деп қазақша сөз бастаған АҚШ вице-президентінің ілтипатын Тәуелсіз жас Қазақстанның халқына, қазақтарға, қазақ тіліне құрметі деп түсініп, жасырмаймын... төбеміз көкке екі елі жетпей жадырап қалдық.
Мәртебелі мейманмен кездесу барысында екі жақты тең құқылы ынтымақтастық, іскерлік серіктестік, сол секілді Семей ядролық полигонының жабылуы, баллистикалық зымырандарды оқтұмсықтардан ажырату, НАТО туралы маңызды мемлекеттік мәселелер қозғалды. Кездесуге Президент Нұрсұлтан Назарбаевпен бірге Қазақстан тарапынан еліміздің сол кездегі Үкімет басшысы Сергей Терещенко, Қорғаныс министрінің міндетін атқарушы генерал-майор Әлібек Қасымов, Сыртқы істер министрі Төлеутай Сүлейменов қатысты.
Бәрі таңсық. Мемлекет басшыларының мұндай басқосуда шампан құйылған бокалдарын соғыстыратынын да алғаш көрдік. Айтпақшы, Қазақстанда дәл бүгін Альберт Гор есімді бірі жігіттің тұрып жатқаны туралы білесіздер ме? Жасы 23-те. Бір қазақ мұғалімінің қандай ойға сүйенгенін, қандай ырымға құлағанын кім білсін, әйтеуір, сол жылы жаңа туған сәбиіне АҚШ-тың сол кездегі вице-президентінің аты-жөнін бір әрпін қалдырмай таңып қойыпты...
Қойын дәптердің бастапқы беттерінің бірінде
1992 жылдың 3 ақпанында Алматыда (Сейфуллин мен Виноградов көшелерінің қиылысында) алғаш рет АҚШ елшілігі ашылды деп жазылыпты. Ол шараның да басы-қасында жүрдік. Салтанат басталғанда америкалықтардың сапырылысып жүрген жерінде тоқтай қалып, орындарында тік тұрған бойда АҚШ әнұранын дауыстап айтқанын көріп, таңдандық. Ашық Америка деген осы екен ғой! – дедік.
Ал енді Альберт Гор сапарының алдында, екі ай бұрын ғана,
1993 жылғы қазан айының 24 күні Қазақстанға Құрама Штаттардың Мемлекеттік хатшысы Уоррен Кристофер келген. Елбасымен кездесті. Мемхатшы Семей полигоны мен Арал теңізі аймағын сауықтыру үшін Құрама Штаттар Сенатының қол қойған құжатымен қоса, Қазақстанға 15 миллион доллар алып келіпті... АҚШ Сенаты екі ел арасындағы инвестициялық жобаны ратификациялаған деген сөздерді тіліміз бұралып, қызыл блокнотқа кәдімгідей қиналып жазғанымызды қалай ұмытайын! Заман, қоғам өзгеріп, тілімізге жаңа терминдер дендеп ене бастаған!
Сол күні түс ауа сағат 15.00-де еліміздің Сыртқы істер министрлігінде әлемдегі ең кішкентай елдің бірі Люксембургтің экономика министрі Роберт Гоббельс сұхбат беріп, Қазақстанмен ұзақ мерзімдік қарым-қатынас жасауға ынталы екендігін білдіріп жатты... Сол күннің ертесіне, яғни
1993 жылдың 25 қазаны күні сағат 12.00-де Ақордада Қазақстан Президенті Нұрсұлтан Назарбаев Иран Ислам Республикасының Президенті Әлиакбар Хашеми Рафсанджанимен кездесті. Әлемдік тұлғаның Алматыға бірінші сапары. Әрі Қазақстан Президентінің шақыруымен Алматыға әдейілеп келген Иран Президентінің аузынан жүрегіңді жылытар жылы-жылы сөздер шықты. «Иран халқы мұсылман, Қазақстан халқының негізін де қазақтар – мұсылмандар құрайды. Сондықтан, екі ел арасындағы дипломатиялық қатынастарда ешқандай да түсініспеушілік болуы мүмкін емес», деген Рафсанджани мырза екі елдің арасында шалқып жатқан Каспий теңізінің байлығы мен судағы және құрғақтағы көлік қатынастарының болашағы жайлы көсіле сөз сөйледі. Бәрі-бәрі қызыл блокноттың бетіне мұқият жазылыпты...
Ұзақ жыл бір-біріне қырғи-қабақ тіресіп, мінез танытып келетін екі ел – Иран мен АҚШ басшыларының араға бір күн салып Алматыда Қазақстан Президентімен кезек-кезек кездесу өткізуі де әлемдік қоғамдастықтың назарын өзіне аударған, талайды ойландырған. Осылайша, астанада күн сайын қым-қуыт өтіп жатқан халықаралық дәрежедегі екі-үш кездесу жүрегін алып-ұшқан тілшілер қауымын кәсіби тұрғыдан ширата түсті, жаңаға бейімдеді... Бұрын-соңды біздің елде өтпеген «пресс-конференция» – «баспасөз мәслихаты» деген жаңа атауды біз жатсынбадық. Телефон қоңырауы «шылдыр» етсе, айтқан жерге топырлап барып бас қоса қоюға да тез арада бой үйреттік. Қазақстандық журналистер ел Тәуелсіздігінің алғашқы сатысында елге жаңаша ұғынықты ақпарат тарату үшін жанын салды. Оның үстіне, кеңестік журналистің қаламы мен блокнотына дыбыс жазғыш әрі қалтаға салуға қолайлы диктофон қосылған заман. Бұрынғыдай редакцияның қызыл куәлігін көрсетіп, барлық есіктен өте беретін еркіндік те жайына қалды, енді Ақордаға қатаң түрде алдын ала жасалған тізім бойынша, қатаң тексеруден өткен соң ғана кіргізеді. Бәрін айт та бірін айт, азуын айға білеген «Азаттық», «Би-Би-Си», «Рейтер» секілді әлемдік ақпарат құралдарының тілшілерімен иық түйістіріп қатар тұрамыз-ау деп кім ойлаған?!
...Қай жерде баспасөз мәслихаты өтсе, сол жерде қазақстандық журналистердің қатарында үнемі «Останкиноданбыз» (Мәскеу) деген киношылардың түсіру тобы жүретін. Бір қызығы, олар мейманға сұрақ қоймайды, бірақ бірі сырыққа байлаған үш көзді шамын көтеріп, бірі шұбатылған тоқ өткізгішке сүріне-қабына микрофонын ұстап зыр қағады да жүреді. Үшіншісі – оператор. Айтуларына қарағанда, тарих үшін кинодерек жинайды. Үлкен екі табағы төртбұрышты қорабына қабыстырылған қолайсыз бейнекамераның «тырылдаған» дауысы бейнебір біздің бала кезіміздегі ауыл клубының кинопроекторын елестетер еді. Сол «тырыл» мәслихат кезінде сөйлеушілердің дауысын диктофонға жазуға кедергі келтіріп мезі ететін. Бірақ бұл киношыларға «қой дейтін қожа, әй дейтін әже» табылмады. Баспасөз мәслихатының басталар алдында олардың шұбырып келіп ең жайлы орынға жайғаса қоятыны да талай әріптестердің жүйкесіне ауыр тие бастаған... Қысқасы, бізді осы бір қолайсыздықтан Қытай Халық Республикасы Мемлекеттік Кеңесінің Премьері Ли Пэн құтқарды...
«Ақорда. 26.ІV.94 – сағат 10.55. ҚХР Мемлекеттік Кеңесінің Премьері Ли Пэн». Мәртебелі қонақтарға арналған үстелге алдымен Ли Пэннің өзі жеке-дара келіп жайғасты. Қап-қара шашын әдемілеп артқа қайырған, қалың көзілдірікті, орта бойлы аққұба бұл кісінің келбетін теледидардан көріп те жүргенбіз. Енді, міне, қол созым жерден бізге қарап ілтипат танытып отыр. «Мотор!» деген сөздің шығуы мұң екен, киношыларымыз әдеттегідей әй-шайға қарамай қарбалас іске кірісті. Әлдекім «Басталды...», – деді жақтырмаған дауыспен. Оператор қобдиша тәрізді зор бейнекамераны мәртебелі қонаққа бағыттап, «тырылын» қосқаны да сол, жарық көтерген сидаң жігіт солай қарай ұзын сырығын бұра берген. Кенет, әлгі сырық басындағы үш көзді шам «тарс» етіп жарылып, жұрт үрпиісе қалды. Шамның сынықтары жерге шашылып түсті. Түтін бұрқ етті. «Тырылдаған» бейнекамераның дауысы өшті. Шошынған қыздардың дауысы шықты. Екі көзіміз – мәртебелі мейманда. Абырой болғанда шыны жарықшақтары қонақ жаққа түспеді. Қас-қағым сәттік абыр-сабыр басылды-ау дегенде барып Ли Пэн сол қолын көтеріп, «Салют... салют», деді жымиып. Жұрт қостап күліп жіберді. «Останкиношылар» асай-мүсейін тез жинап, асығыс-үсігіс залдан шықты. Құлағымыз тыншыды. Бар-жоғы бес минуттың ішінде болған оқиға.
Сағат –
11.00. Залға Қазақстан Президенті Нұрсұлтан Назарбаев келіп кіріп, баспасөз мәслихаты басталды.
Екі елдің басшылары екі арадағы созылып жатқан 1700 километр мемлекеттік шекараның сызығын белгілеген мемлекеттік маңызды шартқа қол қойды. ТМД елдері ішінде ешқандай мемлекет мұндай келісімге қол жеткізбегені осы кездесу барысында айтылды. «Біздің ортақ шекарамыз – екі елдің арасындағы достық, бейбітшілік әрі тату-тәтті көршілер шекарасы болатынына сенемін», деді Қытай басшысы өз сөзінде. Қазақ басшысы осы арада екі ел арасында тұңғыш рет экономикалық арнайы аумақтың құрылғаны жайында мәлімдеді.
Бұл – сырт жақтан да, іш жақтан да «Қазақстанға қос азаматтық лайық!» деп ұрандатып, даурығып, сәуегейлік танытушылардың арқаларының қозып, ұйқыларының бұзылып тұрған тұсы. «Известия» газетінің тілшісі ҚХР Мемлекеттік Кеңесінің Премьері Ли Пэннен «бүгінгі бүкіл ТМД мемлекеттерін қатты толғантып жүрген қос азаматтық мәселесі туралы пікірімен» бөлісуді сұрады. Оған мәртебелі қонақ «Қытай – көп ұлтты ел. Олар тең құқылы, тату-тәтті өмір сүріп жатыр. Қытай екі азаматтықты құптамайды, ол туралы біздің «Азаматтық туралы» Заңымызда нақты әрі түсінікті етіп жазылған», деді қысқа қайырып.
«Сыртқы істер министрлігі. 18.І.94 – сағат 10:30. Словения сыртқы істер министрі Лойзе Петерле...». Лойзе Петерле алдымен таяуда дүниеге келген біздің төл теңгемізге ақ жол тіледі. Словения бұдан екі жыл бұрын ғана «толар» деп аталатын өз ақшаларын айналысқа енгізген екен. Осы екі арада алғашқы инфляцияны басынан өткеріп үлгеріпті. Бірақ, қазір ұлттық ақшалары рынок жүйесінде біршама тұрақтанған. 1 АҚШ доллары 130 толарға, 1 толар 10 ресей рубліне, 1 теңге 10 толарға тең...
Ресейлік әріптестер әдеттегідей сөзден жаңылмай, қос азаматтық туралы сауалды алға тартты. Таңырқай тұрып сөз саптаған Словения сыртқы істер министрі Лойзе Петерле халықтың 90 пайызын словендіктер, 2 пайызын итальялық, қалған бөлігін өзге ұлт өкілдері құрайтын елге мұндай сауалдың шын мәнінде өздері үшін таңсық екенін мәлімдеді.
Сол күні түс қайта 15:00-де Жоғарғы Кеңестің атақты №8 залында Ресей Федерациясы сыртқы істер министрі Андрей Козыревпен баспасөз мәслихаты өтуі тиіс еді. «Тиіс еді» дегенім қызыл блокноттың бетінде «министр белгіленген уақыттан 45 минут кешігіп келді. Баспасөз мәслихаты өтпей қалды» деп жазылыпты. Үлкен холда нөкерлерін шұбыртып арлы-берлі жүріп алған министр, өзі кешігіп келгеніне қарамастан, журналистермен бас қосуға асықпады... Ақорданың жап-жас қызметкерлері Өмірзақ Шөкеев пен Ораз Жандосовтың үлкен терезенің алдында кофе ішіп, өзара әңгімелесіп, тіпті... елегізіп тұрғаны да көз алдымда қалып қойыпты. Кенет Козыревтің көмекшісінің бірі бізге жақындап келіп, министрдің баспасөз мәслихатын өткізбейтінін жеткізді. Дегенмен де, министр Козырев жүріп бара жатып Би-Би-Си-дің екі сұрағына жауап қатты. Ағылшын тілінде ағып тұр. Бізге ол да таңсық... Бірақ, Мәскеу журналистері жанын қойсын ба, шаужайлап жүріп Козыревтің «тілін шығарды». «Бізге (Ресей мен Қазақстанға –
авт.) құжаттар топтамасын әлі де барынша пысықтап алу керек сияқты», деді өңі сынық министр бөгеліп, күмілжіп. «Бірінші – әскери ынтымақтастық, ядролық қарулардың демонтажы... Екінші – құқықтық-гуманитарлық мәселелер, атап айтқанда, қос азаматтық проблемасы». «Үшінші – Байқоңыр ғарыш айлағы...»
Дәл сол тұста жас мемлекеттің басына сындарлы сәттердің туып тұрғанын көпшілігіміз біле бермедік те. «Қос азаматтық» деген бір жақтан, «мемлекеттік тіл» екінші жақтан өкпені қысып, тынысыңды тарылтса, «Жаппай басталған Тәуелсіздік «шеруінің» алдында жүрген Қазақстанның» (Ресей басылымдарынан –
авт.) болашақта ел болып кетеріне күмән тудырып, жаппай таратылған ақпараттар легінің намысты қайрап, қанды қайнатқаны да есте. Бәрі де есте!..
Қызыл блокнотта қызық көп...
Ол күндерге қатысты көп жайттар бүгін ұмытылғанмен, санада мәңгі сақталып қалды. Одан бері де арада ең кемі 22-23 жылдай уақыт өтіпті... тарих көші алға тоқтаусыз екпінмен тіп-тіке тартып келеді.
Қазақстан Тәуелсіздігінің 25 жылдығын тойлап жатыр...
Талғат СҮЙІНБАЙ,
«Егемен Қазақстан»
АЛМАТЫ