Орталық коммуникациялар қызметінде келесі жылдан бастап «Баршаға тегін кәсіптік-техникалық білім» жобасын енгізу бойынша баспасөз мәслихаты өтті. Оған Білім және ғылым вице-министрі Бибігүл Асылова, «Атамекен» ұлттық кәсіпкерлер палатасы бизнес-коммуникацияларды мемлекеттік тілде дамыту департаментінің директоры Бауыржан Оразғалиев және басқалар қатысты.
Брифингке қатысушылар нәтижелі жұмыспен қамту және «Еңбек» бағдарламасы аясында тегін кәсіптік-техникалық білімді енгізудің тетігі туралы мәлімет берді.
Вице-министр Бибігүл Асылованың айтуынша, аталған бағыт бойынша техникалық және кәсіптік білімі бар мамандарды даярлау және қысқа мерзімді кәсіптік оқыту шаралары қарастырылған. Осының нәтижесінде 2017-2021 жылдар аралығында кәсіптік даярлау мен оқытумен барлығы 671,5 мың адам қамтылады.
– Бірінші қолдау шарасы техникалық, ауылшаруашылық, технологиялық, сервис және қызмет көрсету саласындағы мамандықтар бойынша жұмысшы кадрларын даярлауды көздейді. 2017 жыл мен 2021 жыл арасында даярлаумен 471,5 мың адам қамтылады. Оның ішінде республикалық бюджет қаражаттары есебінен – жыл сайын 106,5 мың адам, жергілікті бюджет есебінен жыл сайын 365,0 мың адам оқытылды, – деді ол.
Сонымен бірге оның айтуынша, жаңа бағдарлама бойынша 9-11 сынып түлектері, аз қамтылған отбасылардан шыққан біліктілігі жоқ жастар білім алатын болады. Осы бағдарлама шеңберінде үміткерлердің тізімін қалыптастыруға және іздестіруге ықпал ететін жергілікті білім беру және жұмыспен қамту органдарын, полиция қызметтерін тарта отырып, әрбір елді мекенде әкімдіктер жанындағы мобильді топтар құрылатын болады.
Екінші қолдау шарасы дуалды негізде 1-ден 6 айға дейін қысқа мерзімді кәсіптік оқытуға арналады. Осы жоба бойынша жұмыспен қамту орталықтары тікелей әлеуетті қатысушылардың құрамын қалыптастырады және тізімдерді аудандық (қалалық) комиссияларға жібереді.
Оқыту колледждерде, оқу орталықтарында, әскери-техникалық мектептерде өтеді. Азаматтар мемлекеттік қолдаумен шәкіртақы төлеумен қамтамасыз етілетін болады және сырттан келген тұлғаларға жол жүруге және тұруға қосымша төлем ақы қарастырылған.
Шалғай елді мекендерде тұратын азаматтар да мобильді оқыту орталықтарында білім алу арқылы тегін мамандықты меңгере алады. Іске асыру серпінді режімде Ақмола, Ақтөбе, Шығыс Қазақстан, Маңғыстау, Қостанай облыстарында жүргізілетін болады.
Брифингте «Атамекен» ұлттық кәсіпкерлер палатасы бизнес-коммуникацияларды мемлекеттік тілде дамыту департаментінің директоры Б.Оразғалиев жаппай кәсіпкерлік бағдарламасының екінші бағыты аясында «Бизнес бастау» жобасы бойынша кәсіпкерліктің негіздері оқытылатынын айтты. Кәсіпкерлікке оқытылған азаматтардың өз жұмысын ашуға мүмкіндігі болады. Олар өз ісін бастау үшін микрокредит те ала алады.
Бағдарламаны іске асырған жағдайда жұмыссыздық деңгейі 4,8 пайызға және біліктіліксіз жұмыс күшінің үлесі 20 пайызға төмендейді.
Дастан КЕНЖАЛИН,
«Егемен Қазақстан»