Головкинді жеңу үшін Джейкобс қандай әдіс қолдануы тиіс?

WBC нұсқасы бойынша бірінші орта салмақта бұрынғы әлем чемпионы Серхио Мора қазақстандық Геннадий Головкинді (36-0, 33 КО) жеңу үшін Дэнниэл Джейкобс (32-1, 29 КО) қандай әдіс қолдануы керек екендігін мәлімдеді. Бұл туралы sports.kz хабарлады. «Джейкобс кездесудің басында-ақ өткір шабуылдарға шығып, жойқын соққыларын дарытуы тиіс. Сонымен қатар, Головкиннің екпініне төтеп беріп, қысымынан дер кезінде шыға білуі қажет. Міне, осылайша ол қарсыласының бетін қайтарды», – деп жазды туиттерінде. Бұған дейін Серхио Мора қос боксшының арасындағы жекпе-жекке өз болжамын жасаған. Айтуына қарағанда, 18 наурыз күні Madison Square Garden аренасында жанкүйерлер күткен нағыз айқас болады. Алайда, америкалық бұл ұрыста үш-төрт раундқа дейін ғана шыдауы мүмкін. Айта кетейік, Джейкобс пен Мора шаршы алаңда екі рет кездескен. 2015 жылы тамыз айында Дэнни екінші раундта-ақ сұлатып салса, 2016 жылдың қыркүйегінде жетінші раундта нокаутпен жеңді.