Өскемен қаласының тұрғыны, Еңбек Ері Қайролла Бақтыбаев ағамыз Украинаның Киев, Житомир, Каменец-Подольский, Тернополь, Львов қалаларын неміс басқыншыларынан азат етуге қатысып, Румыния, Венгрия, Австрия жеріндегі ұрыстардың алғы шебінде болған. Майдангердің өңірінде ұрыс даласындағы ерлігінің куәсіндей Қызыл Жұлдыз ордені, «Ерлігі үшін» медалі жарқырайды.
Азаматтық борышын өтегеннен кейін де, Одессадағы металлургия зауытына жұмысқа жіберіліп, тәжірибе жинақтап, тек 1950 жылы ғана елге оралады. Қайролла ағамыздың Өскемен қаласындағы аңызға лайық металлургия саласындағы ұзақ жылғы еңбек жолы осылай басталады. 1950 жылдан 1975 жылға дейін табан аудармай Өскемен қорғасын мырыш комбинатында еңбек етіп, Шығыстағы кешегі одақ дәрежесінде Социалистік Еңбек Ері атағын алғаш алған атақты кенші. жақында Өскемен қалалық жұмысқа орналастыру және халықты әлеуметтік қорғау бөлімі қалалық ардагерлер кеңесі және тұрғылықты шағын аудандағы өзін өзі басқару комитетінің өкілдері 92 жасқа толған Еңбек Ерін арнайы құттықтап барып, сый-сияпат жасады.
Еңбек Ерінің жады мықты. Таңертеңнен бері телефон арқылы құттықтаған адамдар есімін қайталап айтып, өз ризашылығын білдіруді де ұмытпады. Ардагер ағамыз ел мен жердегі көзкөргендерінің амандығын сұрап, жастық кездегі замандастарының ұрпағына асқан ықылас танытты.
Раиса ЗОТОВА,
Өскемен қалалық
ардагерлер кеңесі жанындағы тұрақты комиссия төрайымы
