• 09 Ақпан, 2017

«Алтай» Премьер-лигадан не үшін шығарылды?

132 рет

көрсетілді

2 мин

оқу үшін

Egemen Qazaqstan

Семей әкімінің тұрғындармен есептік беруге арналған кездесуінде ШҚО әкімі Даниал Ахметов «Алтай» футбол клубының Премьер-лигадан шығарылу мәселесін түсіндіріп берді. Бұл туралы arnapress.kz хабарлады. Бұған дейін Қазақстан футбол федерациясының атқарушы комитеті мұндай шешімді клубтың сертификация ережелерін сақтамауға байланысты қабылданғаны хабарланған. Бұл талаптар бойынша «Алтай» құрылымында 9 жас категориясы бойынша кемінде 14 топтан тұратын балалар мен жасөспірімдер команда болу керек. Сонымен қатар, Премьер-лигадағы барлық команданың екінші лигада жастар құрамасы болу керек. Осы мәселеге қатысты «Алтай» футбол клубының жанкүйері облыс әкімін командаға қолдау көрсетіп, премьер-лигаға қайтару үшін шаралар қолдануын сұраған болатын. «Біз футболдың жаңа маусымын күттік, өткен жыл толық команданы қолдап келдік, басқа қалаларға бірге бардық. Командамыздың шеттетілгенін білген соң, сізге арнап видеожолдау дайындадық. Командамыз Қазақстан Премьер-лигасында өңір атынан қатысуына көме болысуыңызды сұраймын", - дейді Серікбай Әлібеков. Ал облыс басшысы «Алтай» клубының басшыларын айыптап, жанкүйерлерді бұл жағдайды өз күштерімен шешуге шақырды. «Былтыр клубты біріктірдік, қаржы бөлдік, жоғары білікті маман шақырдық. Ал енді қаржы жағын анықтай бастағанда қызық жайттар басталды. Мемлекеттік қаржының қайда кеткенін білмейміз. Қалай төлем жасап жатқаны түсініксіз, қысқасын айтқанда мемлекет қаржысын оңды-солды шашқан. Біз түсінік беруді талап ететін боламыз. Қазір клубты кім басқарып жатқаны белгісіз, спорт басқармасымен келіспей команданы жеңіске жеткізген бапкер ауыстырылған. Бізде клубқа қояр сұрақтар көп. Сондықтан құрметті жанкүйерлер, бұл мәселені өздеріңіз шешіп көріңіздер, егер мен кірісетін болсам, бұл оқиға басқаша аяқталады. Еліміздің бірнеше клубының бұрынғы жетекшілері қазір басқа жерде отыр. «Алтай» клубымен солай болғанын қаламаймын. Осы себепті футболды жақсы көріп қана қоймай, қызметке футболды шынайы жақсы көретін адамдарды тартыңыздар», – деді Даниал Ахметов.