Алдағы күндері күн суытады

Синоптиктердің мәлімдеуінше алдағы күндері күн суытады. «Қазақстанда алдағы үш тәулігіндегі ауа райы антициклонға тәуелді болады. Сондықтан синоптиктер көптеген облыстарда ауа-райы жауын-шашынсыз, суық болады деп болжап отыр. Сондай-ақ, түнде және таңертеңгілік уақыттарда тұман түседі», - деп хабарлады «Қазгидромет» РМК. Ауа температурасының төмендеуі Сібірден келген атмосфералық фронттардың өтуіне байланысты. Сол себепті температура жыл сайынғы орташа көрсеткіштен 2-6ºС-қа төмендейді. Республиканың тек батыс аймағында температура қалыпты болады деп күтілуде. Елордада алдағы үш күнде жауын-шашын болмайды. Желдің жылдамдығы 5-10 м/с. Түнде температура -14-17 °С, күндіз -5-8°С. 16 наурыз күні түнде және таңертең тұман түседі. Таяу күндері Алматыны да жауын-шашынсыз, бұлтты ауа райы күтіп тұр. Түнде тұман болады. Желдің жылдамдығы 0-5 м/с. Ауа температурасы түнде -2-4°С, күндіз +3+6°С-ты құрайды.