Ел Тәуелсіздігінің мерейтойлы жылында Астана қаласында 46 балабақша ашылды. Бұл туралы елорда әкімінің кеңесшісі Фейсбуктегі өзінің парақшасында хабарлады.
Оның айтуынша, бүгінгі күні Қараөткел (Ильинка) тұрғын алқабындағы 240 орындық №92 «Жауқазын» балалар бақшасының құрылысы аяқталды. Жалпы аумағы 5 мыңға жуық шаршы метрді құрайды. Екі қабатты ғимарат қазақ тілінде тәлім алатын 12 топқа арналған. Бүлдіршіндерді қабылдау келесі жылдың 1 қаңтарынан басталады.
Астанада мектепке дейінгі білім беру мекемелерінің тапшылығы жаңа балабақшалардың ашылуымен, соның ішінде мемлекеттік-жекеменшік серіктестік көмегімен шешілуде.
«Биыл 46 балалар бақшасының іргесі қаланды. Соның ішінде мемлекеттік тапсырыспен 8859 орындық 44 жекеменшік балабақша және бюджет қаржысы есебінен 440 орындық 2 балабақша бар. Одан бөлек, мемлекеттік-жекеменшік серіктестік аясында 2480 орындық 10 балабақшаның жобасы жүзеге асырылып жатыр. «Бизнестің жол картасы» бағдарламасымен – 31, соның ішінде биыл 5 жоба жасалды. 2017 жылдың бірінші жартыжылдығында 480 орындық 2 балабақшаның ашылуы жоспарлануда», – деп жазды ол.
Айта кетейік, қазіргі таңда Астанада 48 мың 154 бүлдіршінге арналған әртүрлі үлгідегі 261 мектепке дейінгі білім беру мекемесі құрылған. Оның 95-і – мемлекеттік, 2 – ведомстволық, 116 – жеке, 48-і шағын орталықтар.
0-6 жасқа дейінгі балалар саны – 87 947. 3-6 жас аралығындағы балалардың кезегі – 25 550 бала.