Талдықорғанда 40 пәтердің кілті тапсырылды

Тұңғыш Президент күні және Қазақстан Республикасы Тәуелсіздігінің 25 жылдығы қарсаңында Талдықорған қаласында 40 пәтерлі коммуналдық үй пайдалануға берілді. Бірінші кезекте пәтерлерге жетім балалар, мүгедектер, көп балалы аналар, толық емес отбасылар, ҰОС мүгедектері мен басқа да кезектегі азаматтар ие болды. «Бүгін көпшілікпен бірге мерекелік көңіл күйде өздеріңізге 40 пәтерлі коммуналдық үйдің кілтін тапсырғалы тұрмыз. Бұл айтулы оқиғаның Тұңғыш Президент күні және ел Тәуелсіздігінің 25 жылдығы қарсаңында өтіп отырғаны үлкен қуаныш. Сіздерді көптен күткен жаңа баспанаға ие болуларыңызбен құттықтаймын! Отбасыларыңызға береке, молшылық пен табыс тілеймін. Мерекелеріңіз құтты болсын!» – деді облыс әкімі Амандық Баталов. Жалпы, Талдықорған қаласында 2012 жылдан бері жалпы алаңы 87,8 мың шаршы метр болатын 23 тұрғын үй пайдалануға берілді. Соның нәтижесінде 2 мыңға жуық отбасы баспаналы болды. Осы жылдың 9 айында облыс орталығында 4 үй пайдалануға берілді. Жыл соңына дейін тағы 60 пәтерлі коммуналдық үй іске қосылады деп жоспарланған. Сонымен қатар, 9 үйдің құрылысы жүріп жатыр. Оның 4-еуі – жеке инвестиция есебінен салынуда. Бұл өз кезегінде тағы 873 отбасының жаңа пәтерлі болуына мүмкіндік береді.