Астанадағы ЭКСПО-2017 халықаралық көрмесінің алғашқы бес күнінде павильондарды 10 мыңнан астам турист аралады. Соңғы екі күніндегі нақты саны – 5670 турист. Бұл – бас қаладағы 180 қонақүйден алынған мәлімет.
Қазіргі таңда елордада 197 қонақүй мен 91 хостел жұмыс істеп тұр. Сонымен қатар, көрме қонақтарын орналастыратын 18 жатақхана қарастырылған. Олардың тәуліктік бағасы екі мыңнан бес мың теңгеге дейін. Жатақхана орындарын брондау үшін 8 (717 2) 277-815 немесе 8 777 772 05 06 нөмірлеріне хабарласуға болады. Бұдан бөлек, меймандарға елорданың әр аудандарынан 10 мың қолайлы пәтер дайындалған.
ЭКСПО-2017 көрмесіне келетін туристер қымбат қонақүй нөмірлерін брондауда. Меймандар тарапынан «бес» немесе «төрт жұлдызды» қонақүйлерге сұраныс жоғары, ал арзанырақ бағадағы қонақүй, хостел, жатақханаларда орын көп.
Елорда әкімдігі қонақүй бағалары шетелдіктер үшін ғана емес, елдің әр өңірінен келетін қонақтарға да қолжетімді деп санайды. Бағаның тез құбылуына жол бермеу мақсатында жалға берушілердің арнайы қауымдастығы құрылған және http://тorlet.com платформа-сайты жұмыс істейді. Онда онлайн арқылы орын таңдап, брондауға болады.
Мәліметтер «Астана Конвенш Бюро» ЖШС-нен алынды
Әзірлеген
Асан ӘМЗЕБЕК
