Міне, көптен күткен күн де келіп жетті. «Бала дауысы–2017» ұлттық балалар ән байқауына қатысуға тілек білдірген 120-ға жуық үміткер облыстық мәдениет орталығына жиналып, сахнаға шығу кезектерін тағатсыздана тосып тұрды. Біз көпшілік арасынан өңірге танымал «Айналайын» би тобының жетекшісі Ботагөз Мәметованы жолықтырып, ол үкілеп бәйгеге қосқан балақайлардың қандай дайындықпен келгенін сұрадық.
– Мен бір жағынан Петропавл қазақ классикалық гимназиясындағы музыкалық студияда жұмыс істеймін. Мұнда талантты оқушылар аз емес. Оншақтысын баптап әкелдім. Олардың арасында Аяулым Кәрібай болашағынан үлкен үміт күттіреді. Қазақ, орыс, ағылшын тілдерінде ән шырқайды.
Байқауды ұйымдастырушы Толғанай Хасенқызының айтуынша, байқау балалар ән шығармашылығын дамытуды көздейді. Музыкалық білім алуларына көмектеседі. Музыкалық продюсер Айжан Керімқұлова мен әнші, жұл-дызды тәлімгер Луина іріктеу кезеңіне төрелік етіп, «Бала дауысы» жобасының өңірлік жеңімпазын анықтайтын болады.
Сайыс ережесі бойынша реттік нөмір үлестіріліп, бірінші кіру кезегі Айнұр Тілеулинаға бұйырды. «Сәлем, Астана» облыстық байқауының Гран-при иегері «Қисмет» әнін таңдапты. Оны тамылжыта шырқап жүрген Гаухар Қаспақова апасына барынша ұқсауға тырысты. Нұрайым Есқожа мұндай беделді додаға алғаш рет қатысқанына қарамастан өзін еркін, байсалды ұстады. Жан дүниесімен орындаған әндері жүректерге жетіп жатты. Ұзын-сонар кезек күткен қатысушылардың ән сайысы көпке дейін созылып, әркім вокалдық, әртістік қарым-қабілеттерін танытуға барынша ұмтылды.
Қазылардың шешімімен Тайынша қаласындағы №5 қазақ мектебінің оқушысы Әсел Тасмақанова жеңімпаз деп танылып, республикалық кезеңге жолдама алды.
Өмір ЕСҚАЛИ,
«Егемен Қазақстан»
Солтүстік Қазақстан облысы
