Отан қорғаушылардың патриоттық сезімін нығайту мақсатында ұйымдастырылған көрсетілім Қазақстан Республикасының №7552 Ұлттық ұлан әскери бөлімінің әскерилеріне арналып қойылды.
Отандық кинотуындылардың көрсетілуіне басымдық беретін «Алатау» дәстүрлі өнер театрының кинозалында бұған дейін де мемлекеттік мерекелерде қайырымдылық көрсетілімдер ұйымдастырылған болатын. Қарттар үйінің тұрғындары мен ардагерлерге, балалар үйінің тәрбиеленушілері мен мүмкіндігі шектеулі жандар және әлеуметтік жағдайы төмен отбасылардың балаларына толатын кинозалға бұл ретте әскерилер жайғасты. «Балалық шағымның аспаны», «Отты өзен» және «Теміртау» фильмдерінен кейінгі «Елбасы жолы» киноэпопеясының төртінші бөлімі еліміздің Тұңғыш Президентінің мемлекеттік қайраткер ретіндегі келбеті мен партия ұйымының жетекшілігіндегі қалыптасу жолдарын қамтиды. Мұнда Нұрсұлтан Назарбаевтың партком хатшысы болып сайланып, үлкен саясатқа енді араласа бастаған 1971-1977 жылдар аралығындағы қызметі көрініс табады.
Отанға деген сүйіспеншілік пен елдің игілігі, жұрттың қамы жолындағы жанкештілік көрініс тапқан фильмді тамашалаған Ұлттық ұлан әскери бөлімінің әскерилері театр ұжымына алғысын білдірді. Сонымен қатар, «қайырымдылық көрсетілімдері алдағы уақытта да жалғасын тапса» деген тілегін айтты.
Айгүл Аханбайқызы,
«Егемен Қазақстан»
Алматы