Музарттықтар ең алдымен елордадағы Ана мен бала ұлттық ғылыми орталығында болып, онкологиялық аурулармен ауыратын балалармен кездесті. Олармен бірге естелікке суретке түсіп, бірге ән шырқады.
Ал содан кейін елордадағы «Қазақстан» Орталық концерт залында екі бірдей қайырымдылық концертін өткізді. Концерт жанды дауыста «МузАрт» ансамблінің сүйемелдеуімен өтті. Сонымен қатар, кешке «МузАрт LIVE» мегажобасының жеңімпаздары, топ мүшелерінің ізбасарлары қатысты. Концертте «МузАрт» ел арасына кең таралып, халықтың сүйікті әндерінің қатарына қосылған хит шығармаларына қоса, бірнеше жаңа әннің де тұсауын кесті. Мысалы, Бағлан Омаровтың «Туған жер», Ұшқын Жамалбектің «Ерке қыз», Арман Бексұлтанның «Аңсау», сондай-ақ, «Дариға-ай» әндері осы жолы тұңғыш рет шырқалды.
Біз концерт арасындағы үзілістердің бірінде топтың әншісі Сәкен Майғазиевпен тілдескенімізде ол өздерінің қайырымдылық концерттерін жиі өткізетіндерін жеткізді. «Астанадағы концерттерімізді ЭКСПО аясында өткізіп жатырмыз. Ана мен бала орталығында болдық. «Баламның табанына кірген тікен маңдайыма қадалсын» дейтін қазақ емеспіз бе? Алла балалардың ата-аналарына күш-қуат, сабыр берсін дегім келеді. Біз балаларға қуаныш сыйлауға бардық. Онсыз да тағдыр тауқыметін көріп жүрген олардың көңілдерін көтеріп, ертеңдеріне үміт сыйлағымыз келді. Ал енді мына концерттерге келетін болсақ, ұйымдастыру жағына қалалық әкімдік көп көмегін тигізді. Біз бір ай көлемінде дайындалып, көрермен алдына шығып отырмыз», деді Сәкен Майғазиев.
Айгүл СЕЙІЛОВА,
«Егемен Қазақстан»