Жаңа кәсіпорынды аймақ басшысы Ерлан Қошанов пен «ҚазГазБлок» ЖШС акционері Болат Әбілов арнайы келіп іске қосты.
– Бүгін өңірдің әл-ауқатын арттыратын құрылыс материалдарын шығаратын зауыттың жұмысын іске қосамыз. Облысымызда апта сайын бір зауыт іске қосылуда. Елбасымыздың: «Құрылыс саласы ел экономикасының қозғаушы күшіне айналуы керек деген» сөзі бар. Бүгін Елбасы тапсырмасының орындалғанының нақты көрінісін көріп отырмыз. Зауытқа 1,5 млрд теңге инвестиция салынып, 70 адам жұмыспен қамтылды. Ендігі уақытта аймағымызда құрылыс саласы жанданатын болады. Осындай игі істі бастап, туған жерге туын тігіп жатқан Болат Мұқышұлына ризашылығымыз шексіз, – деді облыс әкімі.
Сонымен қатар, Инвестициялар және даму министрлігі Индустриялық даму және өнеркәсіптік қауіпсіздік комитетінің төрағасы Рустам Ақбердин, Ұлттық кәсіпкерлер палатасы басқарма төрағасының орынбасары Елдос Рамазанов, белгілі қоғам және мемлекет қайраткері Оралбай Әбдікәрімов өз тілегін жеткізді. «ҚазГазБлок» ЖШС акционері Болат Мұқышұлы да зауыттың ел игілігі үшін жұмыс жасайтынын айтып өтті.
– Газблок – қазіргі заманғы әмбебап құрылыс материалы. Бүтіндей бір ірі кешенді құрылыстың міндетін тиімді шешеді. Газбетонды блоктар түрлі өлшемдегі ғимараттарды салуға қолайлы. Біздің өнім Қазақстандағы ең сапалы өнім болады. Оның ішінде, Теміртаудың құмындағы кварцтың үлесі шамамен 70 пайыз. Зауыт жылына 150 мың текше метрден аса газблок шығаруға қауқарлы, – деді Б.Әбілов.
Компанияның құрылтайшысы Еркебұлан Ахметовтің айтуынша, автоклавты қатаюдан өткен газблок өте төзімді, құрылыстың түрлі нысандарына қолдануға ыңғайлы, әрі дыбыс жұтылымы мен жылу сақтау қасиеті де жоғары. Ұзаққа төзімділігі кәдімгі кірпіштің пайдалану мерзімімен бірдей. Өнімнің сапасына 80 жылға дейін кепілдік беріледі. Бүгіннің өзінде Қарағанды облысындағы және Астанадағы құрылыс компаниялары тауарға тапсырыс беруге келіссөз жүргізуде.
Мирас АСАН,
«Егемен Қазақстан»
Қарағанды облысы
