Қоғамдық тәртіпті сақтауға, әуе және темір жол көліктерімен қатынайтын жолаушылардың, соның ішінде шетелдік қонақтардың қауіпсіздігін қамтамасыз етуге департаменттің жүзден аса қызметкері күнделікті жұмылдырылады. Есепті мерзім ішінде қабылданған шаралардың нәтижесінде шетелдік қонақтар мен делегацияларды күтіп алу мен шығарып салу кезінде төтенше оқиғаларға жол берілген жоқ.
Көліктегі ІІД бастығының орынбасары, полиция полковнигі Талғат Өтетілеуовтің айтуынша, жыл басынан бері еліміздің көлік полицейлері 29772 құқық бұзушыны анықтап, әкімшілік жауапкершілікке тартылған.
«ЭКСПО-2017 көрмесіне дейін Астана қаласының темір жол вокзалдарындағы жолаушылар ағыны 11-12 мың адамды құраса, бүгінде олардың саны 19 мыңға жетті. Басшылық құрамдағы жауапты лауазымды тұлғалар кезекшілікке бекітілген. Қылмысты анықтау, орын алған оқиғалардың ізін суытпай ашу бойынша қосымша жедел-тергеу топтары құрылды. Бұдан бөлек, республикалық және халықаралық бағыттағы барлық пойыздарға департаменттің қызметкерлері ілесіп жүреді. Сондай-ақ, Кинологиялық қызмет орталығының қызметкерлері қызметтік-іздестіру иттерінің көмегімен перрондар, вокзалдар мен әуежайлардағы жүк бөлімшелерін, жүк сақтау қоймалары мен күту залдарын ұдайы тексеруден өткізуде», деді полиция полковнигі. Көліктегі ІІД-нің жеке құрамы 10 қыркүйекке дейін күшейтілген режімде жұмыс істейді.
Асхат Райқұл,
"Егемен Қазақстан"