Биылғы 12-14 шілдеде болған сапары аясында Гүлшара Әбдіқалықова Беларусь Президенті Әкімшілігінің басшысы Н.Кочановамен кездесті. Кездесуде өңіраралық деңгейдегі және сауда-экономикалық, мәдени-гуманитарлық салалардағы екіжақты өзара іс-қимыл мәселелері талқыланды.
Мемлекеттік хатшы Қазақстан мен Беларусь арасындағы тауар айналымы 2017 жылғы қаңтар-сәуір айларында 160,4 млн доллар болғанын және оның 2016 жылдың тиісті кезеңімен салыстырғанда шамамен 76%-ға өскенін атап өтті.
Гүлшара Әбдіқалықова Беларусь тарапына Астанадағы ЭКСПО-2017 халықаралық мамандандырылған көрмесіне белсене атсалысып жатқаны үшін ризашылық білдірді.
Н.Кочанова мәртебелі мейманға сапармен келіп, ЭКСПО-2017 көрмесі аясында өтетін «Әйелдер болашақтың энергиясы үшін» атты халықаралық әйелдер форумына шақырғанына алғыс айтты.
Сапар аясында Мемлекеттік хатшы Гүлшара Әбдіқалықова елдер мен құрлықтарды біріктіретін ірі мәдени форум – «Славян базары» атты халықаралық өнер фестивалінің ашылуына қатысты.
