Вологдадағы «Елім-ай»

Кострома мен Ярославльдің ар жағында, Карелия мен Архангель­скі­нің бер жағында жатқан іргелі облыстың бірі, Ресейде сары майы­мен атағы шыққан Вологда өңірін­де де қандастарымыз тұрады. «Қа­за­ғым қайда жүрсе елді ойлаған», деп ақын Тұрсынай Оразбаева жыр­ла­ғандай, отандастарымыз өздері­нің бар екендіктерін соңғы жыл­да­ры қо­ғамдық ұйымдар құру арқылы білдірді. Әуелі Вологда қаласында, кейін Череповец қаласында қазақ­тар­дың жергілікті ұлттық-мәдени ав­тономиясы құрылды. Оларға Да­риға Родина мен Мақсұт Сейіткереев есімді жерлестеріміз басшылық ете бастады. Бұдан кейін Вологда қазақ­тары үстіміздегі жылдың бас кезінде өңірлік ұлттық-мәдени ав­то­номияға (ӨҰМА) бірігіп, қоғам­дық ұйым­да­рына «Елім-ай» деп ат қойды. – Вологдада қазақтар аз, аз бол­с­ақ та, мәдени автономиямыздың алға қойған мақсат-міндеті – отан­дастарымыздың азаматтық, эконо­ми­калық және мәдени құқықтарын іске асыру, халықтық ерекшелігімізді сақтап, ана тілімізді, ұлттық мәдениетімізді дамыту, қазақ хал­қы­­ның тарихы мен мәдениетін, ұлт­тық дәстүр-салтын ресейліктерге кеңінен таныстыру, – дейді Вологда қазақтарының жетекшісі, Дү­ниежүзі қазақтарының ІV құрыл­та­йына қатысқан Дариға Елемес­қызы. – Барлық іс-шараларымыз осы ба­ғытта жүргізілетін болады. Бола­шақ­та Вологда жерінде бірінші рет Наурыз мейрамын атап өтуді ой­лас­тырып отырмыз. Қазір Ресей қаз­ақ­тарының федералдық ұлттық-мә­де­ни автономиясымен (РҚФҰМА), бас­қа да өңірлік қазақ қоғамдық ұй­ымдарымен, Дүниежүзі қазақтары қауымдастығымен тығыз қарым-қатынас орнаттық. Айтса айтқандай, Вологда қа­зақ­тарының тұңғыш қоғамдық ұйы­мының ресми беташар рәсіміне Дү­ниежүзі қазақтары қауымдастығы төр­алқасы Төрағасының бірінші ор­ынбасары Талғат Мамашевтің бас­тауымен Самарадан РҚФҰМА президенті Тоқтарбай Дүйсенбаев, Қа­заннан Татарстан Республикасын­дағы «Қазақстан» ӨҰМА жетекшісі Сағит Жақсыбаев, Орынбордан об­лыстық ҰМА басшысының орын­ба­сары Әміржан Төлеубаев, Челябіден «Бірлік» қазақ орталығының вице-президенті Қарлығаш Игимбаева, Санкт-Петербургтен ӨҰМА төраға­сы Мұхтар Антеев, Мәс­кеу­ден «Қа­зақ тілі» қоғамының төр­аға­сы Әбу­ис­лам Тұрсынбаев, Алма­ты­дан «Ту­ған тіл» журналының жау­апты ре­дакторы Жанар Мұқашева қатысты. Делегация мүшелері Вологда об­лысының үкіметінде болып, олар­мен облыс губернаторының орын­ба­сары Владимир Касьянов әңгіме­лесті. Кездесуге облыстың халық­аралық және өңіраралық байла­ныс­тар басқармасының, сыртқы эко­номикалық қызмет басқармасының басшылары мен мамандары қатыс­ты. Басқосуда ресейліктер Вологда облысының әлеуметтік-экономи­ка­лық және инвестициялық әлеуеті жөнінде кеңінен әңгімелесе, делегация басшысы Т.А.Мамашев Дү­ние­жүзі қазақтары қауымдастығы атқарып жатқан жұмыстар жөнінде жан-жақты баяндады. Вологда қазақтары да қосылған делегация мүшелерін Мәскеуде Қа­зақстанның Ресейдегі елшісі Зау­ытбек Тұрысбеков қабылдады. Елшімен кездесу барысында елшілік пен Дүниежүзі қазақтары қауым­дас­тығы арасындағы өзара байла­нысты бұрынғыдан да дамытып, Ресейдегі қазақ қоғамдық ұйым­да­рының жұ­мысын жетілдіру жайы, олардың өз­ара ынтымақтас­тығы­ның, отан­дас­та­рымыздың ана тілін оқып-үй­ре­ну­ге деген ұмтылы­сы­ның көптеген өзекті мәселелері талқыланды. Серікқали БАЙМЕНШЕ. Ресей.