Конференциядан күтер үміт көп

«Ядросыз әлем үшін» халықаралық конференциясының түске дейінгі мәжілістерінің соңында Қазақстан Республи­­­ка­сының Мемлекеттік хатшысы Қанат Саудабаевтың қатысуы­мен журналистерге арналған баспасөз мәслихаты өткізілді. Оны СІМ-нің жауапты қызметкері Роман Василенко ашып, алғашқы сөзді Қ.Саудабаевқа берді. – Құрметті журналистер, бас­пасөз конференциясына қатысу­шы­лар, деп бастады ол өзінің сөзін. – Бүгінгі «Ядросыз әлем үшін» халықаралық форумының осыдан 20 жыл бұрын ядролық полигонды жапқан, бүкіл әлемде қуаты жөнінен төртінші орын­дағы ядролық әлеуетінен өз еркімен бас тартқан Қазақстанда өтіп отырғандығының өзіндік мәні бар. Бүгін біздің жас елімізге әлем­нің көптеген мемлекеттерінен пар­ламентарийлер, саяси және мемлекет қайраткерлері, ха­лық­­аралық ұйымдар басшылары, яд­ролық қаруды таратпау жөнін­дегі дүние­жүзілік үдерістердің бел­сенділері келіп отыр. Бұл форум Қазақстан Президенті Нұр­сұлтан Назар­ба­ев­тың баста­ма­сы­мен өткі­зілуде. Одан әрі Қ.Саудабаев мәр­тебелі қонақтар арасынан баспа­сөз мәс­лихатына МАГАТЭ-нің Бас ди­рек­торы Юкия Ама­но­ның, ЯСЖТШҰ атқарушы хатшы­сы Тибор Тот­­тың, АҚШ Энер­ге­ти­ка минис­трі­нің бірінші орын­басары Дэниел Понеманның келіп отыр­ға­нын атап өтті. Бүгінгі форумы­мызға әлемнің көптеген елдерінен осын­шалықты беделді өкілдіктің келуі дүние жүзі қау­ымдас­тығы­ның біз­дің еліміздің жә­не оның Көш­басшысының ға­лам­дық қау­іпс­із­дікті сақтауға жә­не ядролық қа­терді азайтуға қос­қан үлесіне берілген үлкен баға деп есептеу керек. Форумдағы басты оқиға Президент Н.На­зар­баевтың осы жи­ында сөйлеуі болды. Мемлекет басшы­сының яд­росыз әл­емге же­ту­дің страте­гия­лық жол­да­рын ай­қын­да­уы яд­ролық қару­ды таратпау қоз­ғалы­сына нағыз жол кар­та­сы ретінде қолданы­латын болады. Форумдағы пікірталастар ба­рысында қатысушылар адамзатты ядролық қарудан азат етудің, яд­ролық сынақтардан және ядролық нысандардың апаттарынан зардап шеккен аймақтардағы әлеуметтік-экономикалық және экологиялық проблемаларды шешудің өзекті мәселелерін қарастырады. Форум қорытындысы бойынша Астана декларациясы қабылданады, дей келіп, Қанат Саудабаев сөзінің соңында: жалпы алғанда, біз «Ядросыз әлем үшін» халық­ара­лық форумы адамзатқа пайдалы мақсаттарды орындауға мүмкін­дік берер деген үміттеміз, деп өзінің ойын қорытты. Одан кейін МАГАТЭ-нің Бас директоры Ю.Амано және басқа­лары өздерінің қысқа мәлімде­ме­лерін жасады. Олардың сөзде­рі­нің бәрі Қазақстанның ядросыз әлем құру жолындағы үдеріске сүбелі үлес қосып жүргендігін және оның осы мақсаттар жолын­дағы істерінің маңызын атап өту­ге сайды. Осыдан кейін баспасөз мәслихатына қатысушылар жур­на­листердің көптеген сұрақта­ры­на жауап берді. Соның ішінде ядролық қуатты бейбіт мақсатқа пайдалану жөнінде МАГАТЭ бас­шысына көптеген сұрақтар қой­ылды. Ядролық қуатты қолдана бастаған елдердің бәрін қару жасап жатыр деген күдіктің қайдан шығатынына жауап беруді өтінген сұрақтар көп болды. Мәселен, Иранның ядролық қуатты пай­да­лануға қарсы әлем қауымдас­ты­ғын қарсы қоюдың негізі бар ма деген сауал қойылды. Оған МАГАТЭ басшысы Иранның ұзақ уақыт бойы ұйыммен ынтымақ­та­судан бас тартқандығы және бас­қа да себептер болғанын айтты. Жалпы, біз ядролық қуатты бейбіт мақсатқа бізбен ынтымақтаса отырып пайдалануды қолдаймыз, деді Бас директор. «Егемен-ақпарат».