Еліміз өркендеуіне тілектестік білдірді

Жақында Чехия Парламенті Ауыл шаруашылығы комитетінің мүшелері Мәжіліс үйіне келді. Олар Қазақстан Парламенті Мәжілісінің депутаттарымен жүздесті, деп хабарлады осы палатаның баспасөз қызметі. Қазақстан Парламенті Мәжілісінің А­­г­рарлық мәселелер комитетінің төрағасы Ромин Мәдинов меймандарға еліміз туралы әңгімелеп берді. Қазақстанның агроөнер­кә­сібі – ел экономикасының негізгі саласының бірі. Ата-бабаларымыз ежелден ауыл шаруа­шылығымен айналысқан. Бүгінгі таңда жер бетінде адам санының өсуіне орай халықты азық-түлікпен қамту өзекті мәселелердің біріне айналып келе жатқаны анық. «Қазақ­стан негізінен бидай өсіреді. Еліміз астықты экс­порттауда әлем бойынша алдыңғы он­дық­­қа кіреді. Жыл сайын 20 млн. тоннадай астық өндіріледі, ішкі сұраныстың көлемі 8 млн. тоннадай. Сондай-ақ Қазақстан мал өсіру­де үл­кен әлеуетке ие. Асыл тұқымды мал басын өсіру мақсаты алға қойылды. Біздің комитет аграрлық саланы дамытуға бағыттал­ған заң­дарды шығарумен және жетілдірумен ай­­на­лысады», – деді Р.Мәдинов. Мәжілістің Халықаралық істер, қорғаныс және қауіпсіздік комитетінің хатшысы Виктор Рогалев өз сөзінде екі елдің қарым-қатынасы жақсы дамып келе жатқанын тілге тиек етті. Айталық, қос мемлекеттің парламенттері ара­сында ынтымақтастық тобы бар. Қазақстан парламентшілерінің 32-сі аталған топқа мүше болып отыр. Заң шығару ісінде тәжірибе алмасу үшін осындай кездесулердің маңызы зор. «Сіздер біз үшін айрықша кезеңде – Қа­зақ­стан тәуелсіздігінің 20 жылдығы қар­са­ңын­да келіп отырсыздар. Бүгінгі таңда елі­міз­дің барлық өңірі Астанаға келіп, өз­дері­нің әлеуметтік-экономикалық және мәдени жетістіктерін көрсетіп жатыр. Уақыт­тары­ңыз болса, өздеріңіз де көре аласыздар», – деді В.Рогалев. Меймандар тарапынан сөз алған Чехия Парламентінің Ауыл шаруашылығы коми­теті­нің төрағасы Павел Лукша Қазақстан мен бұрынғы Чехословакия арасында қа­лып­тасқан достық байланыс бар екенін айт­ты. Осы дәстүрдің жалғасатынына сенім білдірді. Чех Республикасы – өнеркәсіптік әлеуеті жоғары ел. Соған қарамастан, елдің экономикалық дамуында ауыл шаруа­шы­лығы қай кезде де басты рөл атқарып келеді. Ауыл шаруашылығы ІЖӨ-нің 10-12 пайызын құрайды. Меймандар Қазақ елінің өркендеуіне тілектестіктерін білдірді. Кездесуге Мәжіліс депутаттары Розақұл Халмұрадов, Ұзаққали Елеубаев және Азамат Тұрсынов қатысты.