Астана қаласының Балалар үйінде «Қуан, сәби» деген атпен ашық есік күні өтті. Білім және ғылым министрлігі Балалар құқығын қорғау жөніндегі комитетінің ұйымдастыруымен өткізіліп отырған шараға жетімдерді қамқорлығына алуға ниеттенген азаматтар қатысты десек, жетім балаларға пана болып келе жатқан үйде бүгінде 209 бала тәлім-тәрбие алып жатыр. Олар 15-20 баладан тұратын 13 отбасыға бөлініп, ағайынды балалардың бір үйде тұруына мүмкіндік жасалған. 2009-2010 жылдары ғимаратына күрделі жөндеу жұмыстары жүргізілген балалар үйінде 74 мыңнан астам кітап қоры бар кітапхана да жұмыс істеп тұр. Мұндағы әрбір баланың денсаулығына да аса зор мән беріледі. Емдеу, стоматология, физио, массаж кабинеттері жұмыс істейді. Жеткіншектер өнерден де құр алақан емес. Халықаралық дәрежеде өткен түрлі конкурстарда жүлделі орындарға ие. Бүгінгі шарада үрмелі аспаптар оркестрі, би ұжымдары өз өнерлерін ортаға салып, келушілердің көңілін бір серпілтіп тастады. Жетімдер үйінің мақтанышы – ол мектеп түлектері. Олар бүгінде Л.Н Гумилев атындағы Еуразия ұлттық университетінде, Музыка академиясында, медицина университетінде оқып жатыр. Балалар үйінен «Отбасын қорғау қызметі» атты кабинет ашылып, бала асырап алам деушілерге психологиялық көмек көрсетілетін болған. Жетімдердің тағдырына бейжай қарамайтын азаматтардың осы шараға көптеп келуі қуантты бізді.
Динара ЖАМШИТОВА, журналист.