Израильдік капрал Гилад Шалит 5 жылға созылған тұтқындаудан кейін Израильге оралатын болды. Сөйтіп, Палестина тарапы Шалитті араағайындыққа жүрген Египетке өткізіп берді. Есесіне Израиль жағы бір капрал үшін 1027 палестиналық тұтқынды қайтаруы тиіс.
Кеше 27 әйел тұтқынды қоса алғанда, 477 адам Палестинаға қайтарылды. Қалған 550 тұтқын еліне алдағы айда оралатын болады. Ал танкист Гилад Шалит 2006 жылдың 25 маусымында тұтқынға түскен еді. Израиль жағы босаған палестиналықтардан қауіптенетіндіктерін де ашық мәлімдеп отыр.
Елшіге қастандық жайы тексерілмейді
Иран билігіне Саудия елшісін өлтірмек болды деп тағылған айып АҚШ тарапынан Иран мен Сауд Арабиясының арасына от тастамақ ниетпен қолдан ұйымдастырылған, деп мәлімдеді Иран президенті Махмұд Ахмадинежад. Оның айтуынша, АҚШ ілгерілеткен айыптаулар күлкі тудырады.
Осының алдында Иран сыртқы істер министрі Али Акбар Салихи өз елінің аталған айыптауға байланысты тексеру жүргізуге дайын екенін мәлімдеген еді. Енді Иран басшылығы айыптауға ешқандай негіз жоқ екенін көлденең тартып, АҚШ-тағы Саудия елшісін өлтіруге әрекет жасалуына байланысты тексеру жүргізілмейтінін мәлімдеді.
Рим папасын ұлтшыл деп атады
Актриса Сьюзан Сарандон Нью-Йоркте өткен кино-фестиваль шеңберіндегі бір шара аясында сөйлеген сөзінде Рим Папасы Бенедикт XVI-ны ұлтшыл деп атады. С.Сарандон «Өлік келе жатыр» фильміндегі рөлі үшін «Оскар» алған болатын.
С.Сарандонның әріптесі Б.Балабан актрисадан сұхбат алу барысында оның артықтау кеткенін меңзегенімен, С.Сарандон Бенедикт XVI-ның ұлтшыл екенін тағы да қайталаған. Бенедикт XVI – Йозеф Ратцингер жасөспірім кезінде шын мәнінде жастардың «Гитлерюгенд» ұлтшыл тобының сапында болыпты. Оның түсіндіруінше, гитлерлік Германияда көптеген жасөспірімдер осы ұйым қатарына өтуге мәжбүрленген.
Януковичті Брюссельге жібермеді
Еуроодақ Украина президенті Виктор Януковичтің Брюссельге сапарын болдырмай тастады. Мұны дипломатиялық корпустағы дерек көзі мәлімдеді. Оның сөзіне қарағанда, сапар екіжақты үнқатысу ұтымды болатын сәтке дейін кейінге шегеріліп отыр.
В.Янукович Брюссельде Еуроодақ президенті Херман ван Ромпеймен және Еурокомиссия басшысы Хосе Мануэль Баррозумен кездесуі керек болатын. ЕО өкілдері сапар кезінде Украинаның экс-прьемері Ю.Тимошенконы босату туралы әңгіме қозғалады деп үміттенген еді. Бірақ Украина президенті сапар алдында ешкімнің елінің ішкі ісіне араласуға құқы жоқ екенін жариялаған болатын.
Американы жаңа соғысқа тартты дейді
Сенатор Джон Маккейн АҚШ президенті Барак Обаманың Угандаға 100 әскери қызметші жіберу туралы шешімі елді жаңа соғысқа тартуы ықтимал деген қаупін білдірді. Ол 100 мыңдай америкалық әскери қызметші Ауғанстанда тұрғанын, ал Ирактан әскер шығару әлі толық аяқталмағанын атап көрсетті.
Сенатордың сөзіне қарағанда, Құрама Штаттар қайтып шыға алмайтын жағдайға тап болуы мүмкін. 2008 жылғы президенттік сайлауда Б.Обаманың бақталасы болған Дж.Маккейн әскерді Конгрестің мақұлдауынсыз жіберу туралы шешімнің аяғы жақсылыққа апармайтынын қаперге салды. «Мен Сомали мен Ливанды ұмытқан жоқпын. Екі жағдайда да АҚШ өз әскерін аталған елдерден ит қуғандай етіп шығарған болатын», дейді сенатор.
Парламенттік мінберге тосқауыл қойды
Украина Жоғарғы Радасындағы «БЮТ-Батькивщина» фракциясының өкілдері біршама уақыт парламенттік мінберге ешкімді жібермей тұрып алған. Олар осылайша әріптестері Юлия Тимошенконың сотталғанына өздерінің наразылықтарын білдірген.
Радада сөз сөйлеген БЮТ фракциясы басшысының орынбасары Андрей Кожемякин парламент өзінің заңдылығын жоғалтқанын, оның қызметін тоқтатуы тиістігін мәлімдеген. Мұндай Рада Украинаға керек емес, дейді ол. Парламент спикері Владимир Литвин мұндай қоқан-лоққыға ешқандай негіз жоқ екенін көлденең тартты. Оның пікірінше, парламентті таратуға оппозиция жеткілікті қолдау көрмейді.
Қысқа қайырып айтқанда:
*Қара нәсілді республикашыл Херман Кейн егер АҚШ-тағы президенттік сайлау қазір өтсе, Барак Обаманы шаң қаптырып кетер еді. Бұл – Rasmussen Reports компаниясы сайтында жарияланған сұрау салулардың нәтижесі.
*Израильдік радикалдар кешегі капрал Гилад Шалитке айырбасталған палестиналық тұтқындар мінген автобусты тоқтатуға әрекет жасады. Жалпы, Израильде аталған айырбасқа қарсылар көптеп саналады.
*Нью-Йорк штатының көптеген тұрғындары жылына 1 миллион доллардан артық ақша табатын америкалықтарға салықты көбейту туралы ұсынысты қолдайтындықтарын мәлімдеген. Қолдағандарды пайызға шаққанда – 72, қарсылар – 26.
*Gallup зерттеу компаниясы Құрама Штаттарда марихуананы мемлекеттік деңгейде заңдастыруды қолдайтындар саны 50 пайызды құрайтынын мәлімдеп отыр. 1969 жылы ондайлар қатары тек 12 пайызды ғана құраған екен.
Интернет материалдары негізінде әзірленді.