Кеше Астанада «Санитарлық-эпидемиологиялық қадағалау саласындағы заңнамалардың ерекшелігі. Бизнесті жүргізу шарты» атты тақырыпта дөңгелек үстел отырысы өтті. Әңгіме Сауда-өнеркәсіп палатасы кәсіпкерлер мен Денсаулық сақтау министрлігінің мемлекеттік санитарлық-эпидемиологиялық қадағалау комитеті өкілдері арасында өрбіді.
Жиында баяндама жасаған Денсаулық сақтау министрлігінің Мемлекеттік санитарлық-эпидемиологиялық комитетінің төрағасы Жандарбек Бекшин саладағы бірқатар шаруаларға тоқтала келе, кейбір кәсіпкерлердің әлі де болса санитарлық талаптарды сақтауда салғырттықтар танытатынын қынжыла айтты. Сондай-ақ бас санитар осының салдарынан астан улану фактісі тіркелген еліміз қалаларындағы біраз мейрамханалар мен кафелерді тілге тиек етті. Қайғылы жағдайға дейін апаруы мүмкін салақтықтың алдын алу әрбір кәсіпкердің міндеті екенін де назардан тыс қалдырмады.
– Кәсіпкерлер мен билік өкілдері арасындағы тікелей үнқатысу, сонымен қатар, олардың құқықтары мен заңды мүдделерін қорғаудың өзекті мәселелері дөңгелек үстелдің басты мақсаты болып табылады. Біздің міндетіміз, отандық кәсіпкерлердің бизнесіне мейлінше жәрдемдесу екенін де айтқан ләзім, – дейді Сауда-өнеркәсіп палатасының вице-президенті Салтанат Аханова.
Аталмыш жиында елуден аса қазақстандық компания өкілдері өздерін толғандырған түрлі сауалдарға жауап алды.
«Егемен- ақпарат».