Жалпы Ақмола облысы ішкі саясат басқармасының Өңірлік коммуникациялар қызметі «Туған жер» арнайы жобасы аясында өңіріміздегі ең танымал тарихи ескерткіштерді жазып-жариялау сериясын жалғастырып келеді. Аты аңызға айнала бастаған Балқадишаға орнатылған ескерткіш туралы жан-жақты ақпарат беруі көпшілік сұранысынан туындаса керек. Балқадиша Ыбырайқызы Ақмола облысы, Зеренді ауданы Кеңөткел елді мекенінің тумасы екен.
Айтулы аруға орнатылған мүсіннің ашылу салтанатына Зеренді ауданының белгілі азаматтары, көпшілік қауым қатысты. Ондағы басты айтылған ой – ескерткіш өскелең ұрпаққа мұра болып қалатындығы. Жалпы ескерткіштің биіктігі 4,2 метр болса, салмағы 6 тонна тартады. Аталған жобаның авторы – Қазақстан Республикасы Суретшілер одағының мүшесі Юрий Попов.
Реті келгенде Балқадиша әнін 1925 жылы Әміре Қашаубаев сонау Париж қаласында өткен дүниежүзілік фестивальде шырқап, жүлделі орын алғаны мәлім. Осылайша атақты әннің кейіпкеріне айналған Балқадишаға арнап орнатылған мүсін арқылы қазақ қыздарына құрмет көрсетіліп қана қоймай, оның сұлулығы арқылы, ақылы мен парасаттылығын дәріптеу жолымен үлгі боларлық нақышта тәрбие жұмыстарын жүргізу көзделген. Адамның ішкі жан дүниесінің сұлулығы сыртқы келбетінде тұратындығын ескерсек, ескерткіш арқылы талай қыздарымыз өздерінің бойында жақсы қасиеттерді қалыптастыруға ұмтылары хақ.
Асқар ТҰРАПБАЙҰЛЫ,
«Егемен Қазақстан»
Ақмола облысы
