Прокурорлардың қадағалау қызметіндегі ең өзекті бағыттарының бірі – бизнеске әкімшілік қысым көрсетудің формаларын анықтап, оның жолын кесу. Осыған орай кәсіпкерлік субъектілерінің құқықтарын қамтамасыз ету мәселесі Бас прокуратураның айрықша бақылауында тұр. Ағымдағы жылы кәсіпкерлік туралы заңдарды бұзудың 6 мыңға жуық фактісі анықталып, прокурорлық ықпал ету шаралары арқылы 4 мыңнан астам бизнес субъектісінің құқықтары қорғалды. Прокурорлардың келтірген наразылықтары бойынша кәсіпкерлердің құқықтарына қатысты 350-ден астам заңсыз актілер жойылды және өзгертілді. Мәселен, Тараз қаласының прокуратурасы салық органының 20-дан астам шаруашылық субъектінің банк шоттарындағы қаржы операцияларын тоқтата тұру туралы заңсыз шешімдерінің күшін жойып, олардың кез-келген заңды кәсіпкерлік қызметте өз мүлігін еркін қолдану жөніндегі конституциялық құқықтарын қорғады.
Бақылаушы құрылымдардың бизнеске заңсыз араласуының кең тараған әдісі – негізсіз тексерулерді жоспарлау болып табылады. Мысалы, Шымкент қаласы Әл-Фараби ауданы бойынша Мемлекеттік санитарлық-эпидемиологиялық қадағалау басқармасы эпидемиологиялық маңызы елеусіз және жоспарлы тексеруден жылына бір рет қана өтуі тиіс 20-дан астам кәсіпкерлік субъектілерін тоқсан сайын тексеруді жоспарлаған. Прокуратура шараларымен аталған тексерулер жоспардан алып тасталды.
Прокурорлар шағын және орта бизнес субъектілерінің күнделікті тұрмыс-тіршілігін де назардан тыс қалдырмайды. Бұрын хабарланғанындай, республиканың барлық аумағында кәсіпкерлердің дабыл қағуымен дереу келіп, тексерушінің заңсыз іс-әрекетінің жолын кесетін прокуратураның жедел топтарының жұмысы ұйымдастырылған. Жыл басынан бастап осындай топтардың сенім телефонына 260-тан астам кәсіпкер хабарласып, 150 заңсыз тексеру жөніндегі мәлімет расталды. Сонымен қатар, осы жылдың сәуір айында енгізілген «Бизнес тірегі» жобасы да табысты жүзеге асырылды. Бұл жоба 6 ай ішінде 2,5 мыңнан астам кәсіпкерге қызмет көрсетті. Жалпы қадағалау қызметінің қорытындысы бойынша 800-ге жуық заңсыз тексеру анықталды, 2 мыңнан астам заңсыз тексеру актілерін тіркеуден бас тартылды.
Прокуратура органдары азаматтардың еңбек құқықтарын қорғау бойынша тұрақты түрде жұмыстар атқарады. Әдеттегідей, еңбекақының дер кезінде және толығымен төленуін қамтамасыз ету мәселесіне де көңіл бөлінген. Үстіміздегі жылдың өткен тоғыз айында прокурорлар заң бұзушылықты жою туралы бір жарым мыңнан астам ұсыныс пен ұйғарым енгізді, 700-ге жуық заңға түсінік берілді. Прокурорлық ықпал ету шараларымен 146 мың жұмысшының жалақысы бойынша 8,1 миллиард теңге сомасындағы берешек қайтарылды. Прокуратура органдары алға қойған міндеттерді сапалы әрі жедел орындау мақсатында жұмыс беруші ұйымдарға үшінші тұлғалардан дебиторлық берешекті өндіріп алуға көмектеседі. Мысалы, «Қарақұдықмұнай» серіктестігінің «Пасифико Дрилинг энд Майнинг» компаниясы алдындағы ақшалай міндеттемесін орындауын қамтамасыз етті. Бұл шаралар өз кезегінде кейінгісінің 180 қызметкеріне 48 миллион теңге жалақы бойынша берешегін төлеуге мүмкіндік берді.
Азаматтарды еңбек құқықтарын бұзғаны үшін жауапкершілікке тарту мәселесі прокурорлардың ерекше бақылауында болады. Алматы қаласы Алатау ауданының прокуратурасы қозғаған қылмыстық іс бойынша «Vtorma Ecology Co» серіктестігінің директоры Р.Парманбеков жұмысшылардың жалақысын бірнеше мәрте кешіктіргені үшін 500 айлық есептік көрсеткіш көлемінде айыппұл төлеу жазасын тағайындай отырып, жазалайды. Өткен кезеңде прокурорлар осы санаттағы 17 қылмыстық іс қозғап, 2 мыңнан астам адам әкімшілік және тәртіптік жауапкершілікке тартылды.
Бас прокуратура басқа құқық қорғау және өкілетті органдармен бірлесе отырып, заңнамамен тыйым салынған ақпаратты тарату фактілерін анықтау және алдын алу мақсатында интернет кеңістігіне тұрақты түрде мониторинг жүргізіп отырады. Бүгінгі таңда экстремизмге шақыратын, сондай-ақ террористік актілерді жасауды қолдайтын материалдар жарияланған 400-ге жуық сайттар анықталды. Астана қаласының прокуроры мен Байланыс және ақпарат министрлігінің талап-арыздары бойынша астаналық аудандық соттар осындай 151 сайттың өнімін заңсыз деп тану және Қазақстан Республикасы аумағында таратуды тоқтату туралы шешімдер шығарды. Прокуратураның 215 сайтқа 14 талап-арызы және Байланыс және ақпарат министрлігінің 11 сайтқа қатысты 1 арызы сот қарауында, ал тағы 100-ден аса сайт бойынша талап-арыздар дайындалу үстінде. Әрине, Бас прокуратура да интернеттің еркін және ашық пайдаланылуына мүдделі. Алайда, ол басқа азаматтардың құқықтары мен бостандықтарына, халықтың өмірі мен денсаулығына қауіп төндірмеуі тиіс. Осыған орай, прокуратура органдары өзге де мүдделі органдармен бірлесе отырып, алдағы уақытта да азаматтардың қауіпсіздігіне, өміріне, денсаулығына, құқықтары мен бостандықтарына қауіп төнбеуі үшін барынша атсалысады.
Шарафаддин ӘМІР.