Асхат РАЙҚҰЛ,
«Егемен Қазақстан»
«Нұр Әлем», арт-орталық, үздік тәжірибелер аймағы және тақырыптық павильон сынды ЭКСПО-ның төрт нысаны туристік орын ретінде қайта ашылған болатын. Осы оқиғаға байланысты Астана тұрғындары мен қонақтары 11-12 қараша күндері ЭКСПО-2017 көрмесінен қалған туристік нысандарды тегін аралау мүмкіндігіне ие болды.
Премьер-Министр мен «Астана ЭКСПО-2017 ҰК» АҚ басқарма төрағасы Ахметжан Есімов ғимараттың сегізінші қабатына көтеріліп, Астананың болашағы жөніндегі экспонаттарды аралап шықты. Сондай-ақ А.Есімов Премьер-Министрге ЭКСПО-2017 аумағының алдағы жоспары туралы баяндады. «Президентіміздің идеясы – көрме келешегінің жарқын болуында. Бұл – болашаққа деген инвестиция, адам капиталын дамыту бағыты. Әзірленген және мақұлданған көрмеден кейін нысандарды қолдану тұжырымдамасы осының жарқын мысалы», деді басқарма төрағасы.
Ахметжан Есімов ЭКСПО-2017 көрмесі кезінде танымал болған «Нұр Әлем» павильонына тоқталып, мұнда шара барысында 1 млн 300 мың адам келгенін еске салды. Енді ол «Болашақ энергиясы» музейі ретінде жұмыс істеп, келушілерін әртүрлі жаңғырмалы энергия көздерімен, осы саладағы соңғы жетістіктермен таныстырмақ. «Мен «Нұр Әлем» павильоны Париждегі Эйфель мұнарасы, Брюссельдегі «Атомиум» іспетті белгілі нысанға айналарына сенімдімін», деді ол.
Айта кетерлігі, «Нұр Әлем» ғимараты мен тақырыптық павильондар энергия музейі ретінде жұмыстарын жалғастыруда. Ал осы аумақтағы өзге ғимараттар «Астана» халықаралық қаржы орталығына, Халықаралық «Жасыл» технологияларды дамыту орталығына және Халықаралық IT-стартаптар технопаркіне беріледі. «Астана ЭКСПО-2017» ҰК» АҚ контент және іс-шараларды ұйымдастыру департаментінің директоры Марат Омаровтың айтуынша, жұмыстарын қайта бастаған «Нұр Әлем» сферасы, арт-орталық, тақырыптық павильон мен үздік тәжірибелер аймағына келген қонақтардың қатары қазірдің өзінде көп. «Барлық павильондар танымалдылыққа ие. Туристік нысандарды тамашалаушылардың саны түскі 12.00-ге дейін 3 мың адамға жетті. Халықтың қызығушылығы әлі де басылған жоқ. Оларға жаңартылатын энергия көздері және түрлері туралы мол деректер ұсынып отырмыз», деді ол.
Шара барысында «Астана ЭКСПО-2017» ҰК» АҚ қоғаммен байланыс департаментінің директоры Сергей Куянов 11 қараша күні көрме маңынан ашылады деп жоспарланған мұзайдынның көпшілікке пайдалануға берілуі кейінге шегерілгенін мәлімдеді. «Мұзайдынды салумен жеке ұйым айналысуда. Олар бізден жер телімін жалға алды. Қазіргі таңда мұз қатыру жұмысы жүргізілуде. Ауа райына байланысты олардың жоспарлары аздап өзгерді. Жасанды мұзды ұстап тұру үшін күндізгі ауа температурасы – 5 градус болуы керек. Ал қазір температура бұл талапқа сәйкес келмей тұр», деді С.Куянов. Оның айтуынша, мұзайдынның қашан жұмысын бастайтыны белгісіз және ауа райына тәуелді болып отыр.
Суретті түсірген
Орынбай БАЛМҰРАТ,
«Егемен Қазақстан»
