Осыдан біраз бұрын «Самұрық-Қазына» ұлттық әл ауқат қоры «Википедия» әмбебап интернет энциклопедиясының қазақ тілді тармағын дамыту жөніндегі маңызды жобаны өз қамқорлығына алуды мәлімдеген еді.
«Аталмыш жобаның осы тамыз айында Хайфа қаласында өткен (Израйль) «Викиманиа-2011» ғаламдық конференциясында халықаралық вики-қауымдастықтың жоғары бағасына ие болып үлгергені баршамызға мақтаныш» деп хат жолдайды «Самұрық-Қазына» ҰӘҚ» АҚ Басқарма төрағасы Тимур Құлыбаев (хаттың мәтінімен www.wikibilim.kz сайтында танысуға болады) википедиядағы қазақша мақала саны 100 мыңнан асқанына орай ұйымдастырылған баспасөз мәслихатына қатысушыларға.
Өйткені, бұл жобаның бастамашысы да әрі бас демеушісі – «Самұрық-Қазына» ҰӘҚ» болып табылады.
Осы жобаны іске асырып отырған «WikiBilim» қорының жетекшісі Рауан Кенжеханұлы «Қазақша википедия» жобасы мұнан былай Үкіметтің назарында болатынын, ҚР Премьер-Министрі Кәрім Мәсімовтің өзінен тікелей хат алып отырғанын мәлімдеді.
Сондай-ақ ұлттық маңызға ие бұл жобаны алға жылжытуға жоо студенттері мен мектеп оқушылары да тартылып отыр. Осы арада оқырманға түсінікті болу үшін аталмыш жоба жайлы айта кетелік.
«Википедия» – әлемдегі ең танымал он интернет брендтің қатарында тұрған жалғыз қоғамдық үлгідегі веб-сайт. Бұл – ғаламтордың әлеуметтік қуатын айғақтаған алғашқы интеллектуалдық және коммерциялық емес жоба. BBC телекомпаниясы Википедияны «YouTube» және «Facebook»-пен қатар XXI ғасырдың ең танымал брендтерінің қатарына қосқан. Биылғы жылы «Википедия» энциклопедиясын ЮНЕСКО-ның қорғауындағы мәдени мұра қатарына қосу туралы бастама көтерілді. Бұл ұсыныс ғаламторда қызу талқылануда. Ұсыныс қолдау тапса, «Википедия» адамзат тарихындағы алғашқы сандық үлгідегі мәдени мұра болмақшы.
Әлемнің 281 тілінде жұмыс істейтін «Википедия» энциклопедиясында 20 миллионға жуық мақала бар. Оның 3,7 миллионы ағылшын тілінде жазылған. Мақала саны миллиондық межеден асқан тағы екі тарау – неміс және француз тілдерінің үлесінде. Орыс тіліндегі мақалалардың саны 780 мыңнан асқан. Алайда, энциклопедияның қазақ тілді бөлімінің дамуы бертінге дейін кенже қалып келді.
«Қазақша Википедия» жобасы туралы келсек, қазақ Википедиясын дамыту қажеттігі көптен бері айтылып келген еді. 2011 жылдың басында байланыс және ақпарат министрлігі осы шаруаны қолға алу бастамасын көтерді, алайда, «WikiBilim» қоғамдық қорының ұсынысы бойынша жобаны қоғамдық негізде іске асыру қажет деп ұйғарылды. Осындай үлгіде жоба 2011 жылдың маусымында басталды. Содан бергі аралықта Википедия энциклопедиясының қазақ тілді тарауындағы мақалалар саны 10 есеге өсіп, 100 мыңнан асты. Қазақша мақалалар жазатын және өңдейтін ерікті редакторлар саны 4 адамнан 230 адамға дейін көбейді. Осының арқасында қазақ тілі Википедиядағы тілдер рейтингісінде 125-орыннан 38-орынға дейін көтеріліп, мақала саны 100 мыңнан асатын «жетік» деп танылған 40 тілдің қатарына кірді.
Бұл жетістіктер жоғарыда атап өткендей, халықаралық вики-қауымдастық тарапынан жоғары баға алған. Тамыздың 4-і мен 7-сі аралығында Израильдің Хайфа қаласында өткен «Wikimania-2011» конференциясының қорытындысы бойынша Қазақстандық «WikiBilim» қоры «2011 жылдың ғаламдық википедияшысы» атағын иеленіп (Global Wikipedian of the Year), Википедияның негізін қалаушы Джимми Уейлстің (Jimmy Wales) арнайы грантын жеңіп алды.
Мақалалардың тез көбеюіне «Қазақ энциклопедиясы» редакциясының көмегі зор болыпты. 100 мыңнан астам қазақ тілді мақалалардың жартысына жуығы «Қазақстан» ұлттық энциклопедиясынан алынған. Сондай-ақ, бұл жобаға Байланыс және ақпарат министрлігі де атсалысып, соның ішінде жоо студенттері «Қазақша Википедия» жобасының жұмысын жүргізуге ерекше ықылас танытқан.
Бұл күндері ерекше көзге түскен ерікті редакторлар қатарынан «Википедия елшілері» іріктеліп, солардың күшімен түрлі аудиторияларда Википедия туралы насихат-семинарлар өткізілуде. «Википедия елшілеріне» бас демеуші атынан тұрақты стипендия тағайындалды.
«Самұрық-Қазына» ҰӘҚ-тың атынан жарияланған вики-бәйгеге 200-ден аса адам қатысуда. Оның шартына сай, Википедияға қазақ тілінде 100 мақала салған алғашқы 100 адам ноутбук компьютерін иеленеді. Сонымен қатар, ашық дауыс беру арқылы үздік деп танылған 10 мақаланың авторы мен ең белсенді 40 ерікті редактор «Nokia» компаниясы тарту еткен телефондарға ие болады.
Сондай-ақ, алдағы қарашаның 18-19 күндері Алматыда түркі тілдес елдердегі Википедиялардың конференциясы өтпек. Оған Түркия, Әзербайжан, Қырғызстан, Татарстан, Башқұрстан, Саха-Якутия елдерінің өкілдері қатысуға ниет білдірген. «Wikimedia Foundation» қорының қолдауымен өтетін бұл басқосудың бір мақсаты – қазақ Википедиясының даму үлгісін басқа түркі тілдер арасында насихаттау.
Бастапқыда жоба жетекшілері 2011 жылдың 16 желтоқсанына дейін қазақ тілді мақалалар санын 200 мыңға жеткізуге ниеттенгені мәлім. Техникалық тұрғыдан бұл міндетке қол жеткізу оңай болғанымен, ұйымдастырушылар бұдан былай сандық межелерді екінші кезекке шегіндіріп, сапаға ден қоюды ұйғарып отыр.
– Энциклопедияға мақала жазу мен оны өңдеу тілге жанашыр және білімге құштар адамдардың қолы қалт еткенде айналысатын интеллектуалдық хоббиіне айналса дейміз, – дейді жоба жетекшілері.
– Бастапқыда аталмыш интернет-ресурстың келешегіне ешкім сене қоймаған еді. Ол кезде сайттағы мақалалар саны бар болғаны 7,5 мың ғана болатын, – деді ҚР Парламенті Мәжілісінің депутаты Мұрат Әбенов. – Ендігі мақсат – қазақша википедиядағы материалдар санын миллионға жеткізу!
Айнаш ЕСАЛИ,
Алматы.