Сенат Төрағасы Қайрат Мәмидің төрағалығымен өткен палатаның кешегі кезекті пленарлық отырысының күн тәртібінде алты мәселе депутаттар талқысына ұсынылды. Соның ішінде 2012-2014 жылдарға арналған республикалық бюджет жобасы ерекше қызығушылық туғызды.
Үш жылға арналған бюджет жобасына қатысты «Қазақстан Республикасының Ұлттық қорынан 2012-2014 жылдарға арналған кепілдендірілген трансферт туралы» заң жобасы үш жыл бойы жыл сайын 1 200 миллиард теңге мөлшерінде айқындалған. 2012 жылы тиісті қаржы жыл соңына ІЖӨ-нің болжамды мәнінен 20 пайыз мөлшерінде төмендетілмейтін қалдық қағидаты бойынша 30,1 пайызды құрайды. Ұлттық қор қаражаты, 2011 жылдың 1 қазанындағы ақпарат бойынша, 7 триллион 197 миллиард теңгеге жетіпті. Сенаторлар аталған заң жобасын бірауыздан қабылдады.
Ал Мәжіліс мақұлдаған «2012-2014 жылдарға арналған республикалық бюджет туралы» заң жобасы бойынша Экономикалық даму және сауда министрі Қ.Келімбетов, Қаржы министрі Б.Жәмішев және Ұлттық банк төрағасының орынбасары Д.Ақышев баяндама жасады. Қайрат Келімбетов мұнай бағасы 2012 жылы 80 долларға, ал 2013-2016 жылдары 70 доллар деңгейінде болжанғанын мәлім етті. Осы уақыт аралығындағы экономикалық өсім 7 пайыз деңгейінде сақталады деп күтілуде. Министр осы ретте инфляцияның 6-8 пайыз аралығында жоспарланғандығын алға тартты. Сонымен, бюджет шығыстарының көлемін 2012 жылы 6,3 триллион теңгеге, ал 2014 жылы 6,9 триллион теңгеге дейін ұлғайту көзделуде.
Болат Жәмішев өзінің баяндамасында қаржылардың қайда бөлінгендігін таратып айтып берді. Сенат қабырғасындағы талқылаулар кезінде білім беруге, денсаулық сақтауға, ауыл шаруашылығына, қоғамдық қауіпсіздік пен халықаралық қызметке байланысты бюджет жобасының шығыстарын 2012 жылы 25,5 миллиард теңгеге, 2013 жылы 9 миллиард теңгеге ұлғайту және 2014 жылы да осыншама қаржы бөлу көзделген. Жалпы, сенаторлар жобаға 160-қа жуық өзгерістер енгізгені белгілі болды. Үшжылдық бюджет жобасында әлеуметтік қамсыздандыру мен әлеуметтік көмекке 4 триллион 38 миллиард теңге шығындалады деп күтілуде.
Білім беру мен ғылымға жұмсалатын шығыстар үш жылға 1 триллион 155 миллиард теңгені құрайтын болса, денсаулық сақтау саласына 1 триллион 315 миллиард теңге деп белгіленіпті. Мәдениетке қарастырылған қаржы үш жылға 61 миллиард теңге болып белгіленсе, мемлекеттік және өзге де тілдерді дамытуға 13 миллиард теңге көзделген. Туризм және спорт саласына үшжылдық бюджетте қарастырылған қаржы 95 миллиард теңгені қамтыған. Байланыс саласына 74 миллиард теңге көзделсе, соның басым бөлігі – 57 миллиард теңге телехабарларын сандық эфирде таратуды дамытуға бағытталған қаржы. Осы ретте жаңалықтар 24 телеарнасы үшін жабдықтар сатып алуға 2012 жылға қосымша 1 миллиард 400 миллион теңге беріліп отыр.
Сондай-ақ үш жылға арналған ауылдағы кәсіпкерлікке 9,5 миллиард теңге, тұрғын үй құрылысы мен тұрғын үй-коммуналдық шаруашылығына – 401, ауыл шаруашылығына – 965, ғарышты игеру саласына – 43 және автомобиль жолдарын дамытуға жыл сайын 235 миллиард теңгеден бөлу қарастырылған. Ақша-несие саясаты бойынша баяндама жасаған Данияр Ақышев баға тұрақтылығын қамтамасыз ету мәселесіне кеңінен тоқталды. Оның сөзіне қарағанда, 2011 жылдың 9 айындағы инфляция 6,5 пайыз болыпты. Жылдық инфляция деңгейі 8 пайыз деңгейінде қалыптасады деп күтілуде. Өткен тоғыз айда ақша массасы 15,8 пайызға өссе, ақша базасы 12,1 пайызға кеміген. Қазіргі таңда еліміздің алтын-валютадағы халықаралық резервтері 75 миллиард АҚШ долларын құрайды. Жыл басынан бері аталған қор 26,6 пайызға өскен.
Бұдан кейін депутаттар Премьер-Министр Кәрім Мәсімовке және Үкімет мүшелеріне көптеген сұрақтар қойып, тиісті жауаптар алды.
Осылайша жан-жақты талқылауға түскен 2012-2014 жылдарға арналған республикалық бюджет жобасы қабылданды. Соңынан Үкімет басшысы сенаторларға өз ризашылығын білдіріп, халықаралық жағдайларға қысқаша шолу жасады. Депутаттар күн тәртібіндегі өзге де мәселелер бойынша тиісті шешімдер қабылдады.
Асқар ТҰРАПБАЙҰЛЫ.