Тіл жанашырлары марапатталды

Қоғамның бұл жоғары марапаты екі жыл сайын мемлекеттік тілді дамыту мен насихаттауға елеулі үлес қосқан еліміздің, сондай-ақ шет мем­ле­кет­тердің азаматтарына табыс­тала­ды. Биыл республикамыздың шарта­ра­бынан 37 адам «Тіл жанашыры» бай­қауының лауреаттары атанды. Олар­дың арасында ресми іс-қағаздардың мемлекеттік тілде жүргізілуіне зор ең­бек сіңірген мемлекет қайраткерлері, қазақ тілінің мәртебесін көтеруге, ел­дің әлеуметтік жағдайын жақсартуға жо­марттық жасап жүрген кәсіпкерлер, жас ұрпақты ұлт жандылыққа бау­лып жүрген ұстаздар мен қоғам бел­сен­ділері бар. 

Салтанатты жиынды ашқан Пре­зи­дент Кеңсесінің бастығы, Тұңғыш Пре­зидент – Елбасы кітапханасы дирек­торының міндетін атқарушы Махмұт Қасымбеков: «Біз осы іс-шараны өткізу үшін Елбасымыздың Астанадағы ре­зи­денциясының күмбезді залын әдейі таңдап алдық. Оның себебі, осыдан 20 жыл бұрын 1991 жылы 10 жел­тоқ­санда нақ осы залда Парламент пен Үкі­метттің бірлескен отырысы өткі­зіліп, Ақмола қаласы еліміздің жаңа аста­насы болып салтанатты түрде жария­ланған болатын.Сондай-ақ Елбасымыз мемлекетіміздің тарихындағы аса маңызды өзге де көптеген шешімдеріне осы ғимаратта қол қойған. 

Биыл «Тіл жанашыры» қоғамдық қорының жұмыс істей бастағанына 10 жыл толып отыр. Осы мерзім ішінде ұйымның атқарған істерінің ауқымы да кеңейіп, осы игі іске атсалысып жүрген азаматтар саны да көбейіп келеді. 100-ден астам ұсыныстың ішінен осы құрметке 37 азамат нағыз лайық деп таңдап алынды. Сондықтан бүгін табыс етілетін «Тіл жанашыры» құрмет белгісін – сіздердің осы кезге дейін атқарған істеріңізге деген құрметіміз деп қабылдаңыздар», деді. 

Үміткерлерді көрнекті қоғам қайраткерлері, ғалымдар мен меценаттардан құрылған арнайы комиссия іріктейді. Комиссияны «Тіл жанашыры» қоғамдық бірлестігінің құрметті төрағасы Президент Кеңсесінің бастығы, Тұңғыш Президент – Елбасы кітапханасы директорының міндетін атқарушы Махмұт Қасымбеков басқарады. 

Алғаш рет «Тіл жанашыры» құрмет белгісімен қазақ тілін зерттеген шетелдік ғалымдар марапатталған еді. Олардың қатарында Түркия, Оңтүстік Корея, Ресей, АҚШ ғалымдары бар.

Махмұт Базарқұлұлы «Тіл жанашыры» қоғамдық бірлестігін құрып, бастама көтерген Алтынбек Әбішев пен Нұргүл Қарағойшинаға, лауреат­тар­ды таңдауда әділ төрелік еткен ко­миссия мүшелеріне арнайы ризашы­лығын білдірді. «Сіздердей азамат­тар бар кезде туған тіліміз ешқа­шан тұғырынан түспейді. Осы үлгі-өне­гелеріңіз жүздеген тіл жанашырларына жол ашады деп сенемін», деді Махмұт Қасымбеков.

Бағашар ТҰРСЫНБАЙҰЛЫ,
«Егемен Қазақстан»

Суретті түсірген
Ерлан ОМАР,
«Егемен Қазақстан»