Мемлекет басшысы жанындағы Адам құқықтары жөніндегі комиссия ел Тәуелсіздігінің 20 жылдығына арнап «Адам құқықтарын қорғаудың халықаралық және ұлттық тетіктері туралы» халықаралық дөңгелек үстел өткізді.
Дөңгелек үстелдің жұмысына Президент Әкімшілігінің, заң шығарушы, атқарушы және сот билігі өкілдері, адвокаттар, белгілі заңгер-ғалымдар, халықаралық ұйымдар мен дипломатиялық өкілдіктердің басшылары, білім беру, ғылым және мәдениет, денсаулық сақтау ұйымдарының, сондай-ақ үкіметтік емес ұйымдардың өкілдері, «Астана» университетінің оқытушылары мен студенттері қатысты.
Онда Комиссия төрағасы Сағынбек Тұрсынов, «Астана» университетінің ректоры Еркін Оңғарбаев, ЕҚЫҰ-ның Астанадағы орталығы басшысының орынбасары Жаннет Клетцер ханым, Ұлыбританияның Қазақстандағы елшісінің орынбасары Джон Терлоу мырза сөз сөйледі.
Олар Қазақстанның адам құқықтарын сақтау мен қорғауда және демократиялық негіздердің іргетасын қалауда жеткен жетістіктерді атап өтіп, Біріккен Ұлттар Ұйымының адам құқықтарын қорғауға қатысты қабылдаған 60-тан астам көпжақты әмбебап келісім-шарттарын ратификациялағанын айтты. Қазақстан ратификациялаған Азаматтық және саяси экономикалық, әлеуметтік және мәдени құқықтар туралы пактілер және БҰҰ-ның адам құқықтары саласындағы басқа да шарттары еліміздің ұлттық заңнамасының ажырамас бір бөлігі болып саналады. Қазақстанды әлем елдері нарықтық экономикасы дамыған, демократиялық үрдістерді ілгерілемелі түрде іске асырып жатқан, адам құқықтары мен бостандықтарын жоғары құндылық ретінде санайтын ел ретінде танып отыр.
Дөңгелек үстелге қатысушылар еліміздегі адам құқықтарын қорғауды одан әрі жақсарта түсу үшін мемлекеттік органдар мен үкіметтік емес ұйымдардың күштерін біріктіре отырып, Адам құқықтары мен бостандықтарын қорғау және қамтамасыз ету жөніндегі тұжырымдама немесе Адам құқықтарын қорғаудың жаңа ұлттық іс-қимыл жоспарын әзірлеу керектігін айтты.
«Егемен-ақпарат».