Қазақстан Республикасы Экономикалық ынтымақтастық және даму ұйымының комитеттеріндегі байқаушы мәртебесін алуға өтінішінің тұсаукесерін өткізді
Кеше Парижге жұмыс сапарының аясында Қазақстан Республикасының Премьер-Министрі Кәрім Мәсімов Экономикалық ынтымақтастық және даму ұйымы (ЭЫДҰ) кеңесінің отырысына қатысты, деп хабарлады Қазақстан Премьер-Министрінің баспасөз қызметі.
ЭЫДҰ кеңесінің отырысында сөз сөйлеген Кәрім Мәсімов Қазақстан Республикасының ұйым комитеттеріндегі байқаушы мәртебесін алуға өтінішінің тұсаукесерін өткізді.
Кәрім Мәсімов өзінің сөзінде еліміздің ЭЫДҰ стандарттарын енгізуге және ұйым комитеттерімен әрі қарай ынтымақтасуға деген талпынысын жеткізді.
«Жарты ғасыр бұрын, ЭЫДҰ құрылған кезде, Қазақстанның уақыт өте келе аталған Ұйымға өтініш беретінін ешкім білген жоқ. Тіпті 20 жыл бұрын да, біздің еліміз тәуелсіздік алған кезде, мұндай шамшылдық сенімсіз көрінер еді», – деп атап көрсетті К.Мәсімов.
Қазақстан Премьер-Министрі «соңғы 20 жылдың жеңіл болмағанын», бірақ бүгінде Президент Н.Назарбаевтың жетекшілігімен үлкен жетістіктерге қол жеткізілгенін көлденең тартты.
«Біздің бұдан былай жаңа идеялар мен инвестицияларға экономикамыз ашық. Азаматтарымыздың бай әлеуетін барынша пайдалану үшін заманауи инфрақұрылымды және жоғары білікті білімі бар әртараптандырылған және инновациялық экономика құрылысына инвестиция салудамыз», – деді Қазақстан Премьер-Министрі өз сөзінде.
«Бүгінгі таңда біздің жекеменшік секторымызда шағын және орта бизнестің 700 000-ға жуық кәсіпорны 2,5 млн. адамды жұмыспен қамтып отыр. ТМД елдерінің ішінен тек Ресей ғана жан басына шаққанда ең көп сыртқы инвестиция тарта алған. Сондай-ақ елімізге тартылған 136 млрд. доллар инвестицияның жартысы соңғы төрт жылдың үлесіне тиеді, бұл маңызды жәйт», – деп атап көрсетті Кәрім Мәсімов.
Соңғы жиырма жылда Қазақстан экономикалық өсімін сақтады, ішкі жалпы өнімді жан басына шаққанда 12 есеге арттырды – 700 АҚШ долларынан 9 000 АҚШ долларына дейін жеткізді. Соңғы 10 жылда еліміз экономикасы тез дамыған әлем елдерінің ондығына кірді және қазір Дүниежүзілік банктің жіктелімі бойынша біз табысы орташа деңгейдегі ел болып табыламыз.
«Біздің экономикамыз әлемдегі тез дамушы экономикалардың бірі болып табылады, оның орташа өсімі жылына 8% құрайды», – деді Қазақстан Премьер-Министрі өз сөзінде.
Кәрім Мәсімов ұйымға қатысушы елдердің өкілдерін Қазақстан Үкіметінің ЭЫДҰ-мен ынтымақтастығы туралы хабардар етті. Білім беруді жаңғыртудың мемлекеттік саясатында сарапшылардың ұсыныс-кеңестері ескерілді. Қазір Қазақстанда қолға алынып отырған инвесторларға арналған «бір терезе» қағидасы да ЭЫДҰ-ның үздік тәжірибесіне негізделген.
Қазіргі таңда ЭЫДҰ-мен серіктестікте жекеменшік сектордың, ұлттық экономиканың бәсекеге қабілеттілігін дамыту, мемлекеттік органдардың ашықтығын және есеп берушілігін арттыру, сыбайлас жемқорлықты және оның себептерін еңсеру жөніндегі жұмыстар жалғасуда.
Маңыздысы сол, Қазақстан Республикасы ЭЫДҰ-ның бәсекеге қабілеттілігінің Еуразиялық бағдарламасына мүше болып табылады.
«Жарты ғасыр бұрын, ЭЫДҰ құрылған кезде, Қазақстанның тәуелсіз ел болатынын ешкім білген жоқ. Жүйелі түрде жаңғырту үрдісін жүргізген Қазақстанның экономикасы жедел дамыған әлемнің үздік он елінің қатарынан көрінетінін де ешкім білген жоқ. Біз Қазақстан өкілі Экономикалық ынтымақтастық және даму ұйымының байқаушылары қатарына қосылатын күнді асыға күтеміз», – деді Кәрім Мәсімов.
Сөз реті келгенде, ЭЫДҰ-ның әлемнің Ұлыбритания, АҚШ, Канада, Швейцария және т.б. ең дамыған 34 мемлекетінің басын қосып отырған ұйым екенін, әлемдік ішкі жалпы өнімнің 60%-ы ұйымға мүше мемлекеттердің үлесіне тиетінін айта кетейік.
