Қазақстан • 19 Ақпан, 2018

Елбасы Қоры сыйлығының лауреаттары марапатталды

256 реткөрсетілді

Астанадағы Назарбаев орталығында Қазақстан Республикасы Тұңғыш Президенті – Елбасы Қоры сыйлығының лауреаттарын салтанатты марапаттау рәсімі өтті. 

baq.kz

Салтанатты шараға Ақпарат және коммуникациялар министрі Дәурен Абаев, Мемлекеттік сый­лық­тың лауреаты, композитор Төлеген Мұхамеджанов, Мәжі­ліс Төрағасының орынбасары Вла­димир Божко, Сенат депутаты Бірғаным Әйтімова сияқты елімізге белгілі өнер және мемлекет қайраткерлері қатысты.

2008 жылы Тұңғыш Пре­зи­дент Қоры ғылым, мәдениет және өнер саласында таланттарды қолдау мақсатында өз сый­лы­ғын тағайындаған болатын. Содан бері үздіксіз беріліп келе жатқан бұл марапат – Қордың ең құрметті сыйлықтарының бірі.

Сыйлық байқау негізінде музыка, театр және сәулет өнері, хореография, кинематография, көркем әдебиет, журналистика, физика, математика, инженерлік, қоғамдық және гуманитарлық ғылымдар аталымдары бо­йынша айрықша шығармашылық жобаларына және заманауи ғылыми-зерттеулерге беріледі.

Қор сыйлығы танымал қай­рат­керлер үшін жоғары мәрте­бені тағы бір дәлелдеу болса, дебютанттар үшін – өзін көр­сетудің тамаша мүмкіндігі.

2017 жылдың қорытындысы бойынша байқау комиссиясына мәдениет және өнер саласы бо­йынша 57 жұмыс келсе, ғылым және техника бағыттары бойынша 59 жұмыс түскен. Қор төңірегінде жұмыс істейтін жас ғалымдар кеңесі және шы­ғар­машыл жастар кеңесінің мүше­лерінен тұратын байқау комис­сия­сының шешімі бойынша 12 аталым бойынша 21 адам лау­реат атанды. Ма­рапат­тау­дың сал­танатты рәсімінде әрбір лау­реат­қа диплом, кеуде бел­гісі және ақ­шалай сыйақы табысталды.

Жаңа лауреаттарды құт­тық­тай отырып Тұңғыш Президент – Елбасы Қорының атқарушы директоры Қанат Жұмабаев: «Бұл сыйлық жас таланттардың отын жағып, талаптарына қанат бітіру үшін керек. Елбасы әрдайым жастарға сенім артып, әрқашан жастар еліміздің болашағы екенін айтып келеді. Үнемі жаңа буынға демеу көрсету арқылы Елбасы қазақ жастары елімізге адал қызмет ететін азамат болатындарына сенеді», деді.

Елбасы қоры сыйлығының лауреаттары қатарында актер Берік Айтжанов, әнші Бибігүл Жанұзақ, режиссер Есләм Нұр­та­зин, ғалым Сұлтанқожа Ами­тов сынды өнер, ғылым саңлақтары бар.

Бағашар ТҰРСЫНБАЙҰЛЫ,

«Егемен Қазақстан»

Баннер
Соңғы жаңалықтар

Ұқсас жаңалықтар