«Жезқазған – жерұйығым жүректегі...» атты жыр кеші С.Қожамқұлов атындағы қазақ музыкалық-драма театрында өтті. Кеш шымылдығын аталған театрдың әртістері публицист ақынның «Қара орамал» атты поэмасын өзек еткен қойылыммен түрді. Айта кету керек, әлемнің 13 тіліне аударылған бұл туынды Швецияда өткен «Open Eurazian-2017» әдеби фестивалінің «Поэзия» аталымы бойынша жүлдегері болған. Атышулы «ҚарЛаг»-тың қапасында туған сәбилерді ана құшағынан жұлып алып, тор ішіне тоғытқан қасіретті жылдардың шерін ұқтырып, зарын жеткізген әртістердің шебер ойыны зал толы көрерменнің көзіне жас алдырды.
Кеш – сахна төрінен орын алған ақын және жүргізушінің еркін үнқатысуы пішімінде жүргізілді. Сұрақтарға жауап бере отырып, ақын Ғалым Жайлыбай бүгінгі күнде өзін ғана емес, қоғамды толғандырған өзекті мәселелер төңірегінде ой толғады. Ойға алған жоспарларымен бөлісіп, жырларын оқыды.
Жезқазған қаласының әкімі Батырлан Ахметов ақынды мерейтойымен құттықтап, иығына шапан жапты, астына ат мінгізді. Бұдан кейін мерейтой иесін құттықтаушы қауым кезек-кезегімен сахнаға көтеріліп, лебіздерін жеткізіп, өздерінің ақжарма тілектерін білдірді. Олардың қатарында Мемлекеттік қызмет саласындағы өңірлік хабтың басқарушы комитетінің төрағасы Әлихан Байменов, танымал тележурналист Нұртілеу Иманғалиұлы, ақын, Қазақстан Жазушылар одағы Қарағанды облыстық бөлімшесінің төрағасы Серік Ақсұңқарұлы және жергілікті зиялы қауым өкілдері болды.
Ғалым Жайлыбайдың әуезді жырларына жазылған әндер де кең сарайдың ішінде қалықтады. Әсіресе, ақынның «Есіл ағады» әні көрермен қауымды Сарыарқаның майда салқын самалындай сергітіп, сырлы сезім құшағына бөледі.
Ақын жыр кеші басталмас бұрын қаладағы №8 мектеп-гимназияның ұстаздары және оқушыларымен жүздесті. Білім ордасында ол өскелең ұрпақ өкілдерінің сұрақтарына жауап беріп, өзінің соңғы кездері жазылған өлеңдерін оқыды. Одан кейін оқырмандармен жүздесу Жезқазған қалалық тарихи-археологиялық мұражайы қабырғасында жалғасын тапты. Бұл жерде ақынмен бірге ере келген қонақтар Жезқазған-Ұлытау өңірінің тарихынан сыр шертетін жәдігерлермен және құнды деректермен танысты.
Қайрат ӘБІЛДА,
«Егемен Қазақстан»
Қарағанды облысы,
Жезқазған қаласы
