![Елімізде блокчейн технологиясы мен криптоиндустрияның дамуына жағдай жасайтын жоба іске қосылды](/article_photo/1519706722_article_b.jpeg)
Шараға қатысқан «Digital Network» СТКА президенті Олжас Муртазин блокчейн технологиясы кәсіпорын шығынын 50-ден 80 пайызға дейін үнемдеуге мүмкіндік беретінін атап өтті.
«Digital Network» қауымдастығы жетекші ұйымдарды біріктіре отырып күнделікті өмірге цифрлы технологияларды енгізу арқылы оң нәтижеге жетуді көздейді. 2018 жылы біз алғашқы отандық криптобиржаның, тұңғыш заңды криптоайырбастау орталығының ашылуын жоспарлап отырмыз. Сонымен қатар ұлттық компаниялар тарапынан блокчейн технологиясын енгізуде серіктестік күтілуде. Ал білім саласында «Атамекен» ҰКП-мен бірлесе отырып, криптоиндустрияға қатысты кәсіпкерлерге білім беруді күшейтпекпіз. Криптоайырбастау орталығы мен биржа мәселелері бойынша Ұлттық банк төрағасы Д.Ақышевпен кездесу жоспарланған. Нақты жоспарлар тізімі бекітілген. Криптоиндустриядағы салық мәселесі бойынша Қаржы министрі Б.Сұлтановпен, бизнесте ІСО өткізу мәселелері бойынша «Атамекен» ҰКП басқарма төрағасы Т.Құлыбаевпен кездесулер жоспарланған. Сондай-ақ саладағы алаяқтық құрылымдарды, «пирамидаларды» анықтауға үлес косып, мемлекеттік органдармен бірлесе отырып заңнамалық базаны дайындауға атсалысу қарастырылған», деді ол.
Сонымен қатар Қазақстан экономикасында жаңа қызметтердің пайда болуы әлемдік қауымдастық үшін де жетістік болатынын баяндап, бүгінгі таңда блокчейн технологиясын жасаудағы үздік германиялық компаниясының стратегиялық серіктесі Blockchain Consulting Group бірлесіп жұмыс істеп жатқанын жеткізді.
«Қазіргі таңда бұл компаниялар ұлттық компанияларға, Инвестициялар және даму министрлігіне, «Самұрық – Қазына» АҚ, «Байтерек», «СберБанк», тағы сол сияқты ірі мекемелерге цифрлы, өндірістік, қаржылық процестерге блокчейн технологиясын енгізу бойынша өз қызметтерін ұсынып отыр. Өз кезегінде блокчейн технологиясы кәсіпорын шығынын 50-ден 80 пайызға дейін үнемдеуге мүмкіндік береді. Ал Crowdsale Network адам өміріне сапалы әсер ете алатын, әлеуметтік маңызды жобаларды үнемі қолдап, іске асуына атсалысып отырады», деді «Digital Network» СТКА президенті Олжас Муртазин.
Рауан ҚАЙДАР,
«Егемен Қазақстан»