Президент атап өткендей, қазіргі кезде еліміздің жоғары оқу орындарында 530 мыңнан астам студент білім алып жүр. Олардың 30 процентке жуығы мемлекеттік грант бойынша оқуда. Бұл әр он студенттің жетеуі университеттер мен институттарда оқу ақысын өз қалталарынан төлеп жүр деген сөз. Қазіргі заманда білім болашақ маманның бәсекелестікке қабілеттілігін анықтайды. Себебі жақсы білім – сенімді іргетас. Ол жас адамның өз мүмкіндігін іске асырып, экономикалық жағдайын жақсартуға жол ашады.
Экономикалық тұрғыдан білімді, өз-өзіне сенімді жастар бүгінде және болашақта елімізге қажет. Ол үшін, әрине, маман өз өмірінің барлық саласын жаңғыртуы тиіс. Мемлекет басшысы Үндеуінде жаңа оқу жылынан бастап жыл сайын бөлінетін 54 мың мемлекеттік грантқа қосымша 20 мың грант бөлуді тапсырды. Оның 11 мыңы техникалық мамандықтар бойынша бакалаврлық білім беруге тиесілі болады. Сондай-ақ ол жаңа оқу жылында мемлекеттік грантқа ие болатын студент-жастардың қатарын 37 процентке арттырмақ.
Міне, бұл «Төртінші өнеркәсіптік революция жағдайындағы жаңа экономикаға» сұранысқа ие болатын жаңа мамандар даярлауға мүмкіндік береді. Технологиялық серпілісте еңбек рыногында инженерлер, ақпараттық технология, робот-техникасы, нанотехнология салаларында маман-кадрлар ерекше сұранысқа ие болады. Сол себептен мемлекет жастарға мүмкіндігінше қолдау көрсетіп отыр.
Жоғары білім адами капиталды құрудың және дамытудың факторы екені белгілі. Осы мәселелерді Президент өзінің Қазақстан халқына жолдауларында да атап көрсетіп келеді. Жасыратыны жоқ, біздің елімізде біліктілігі жоғары мамандар тапшылығы проблемасы бар. Оның басты себебі оқу орындары түлектерінің орташа білім деңгейінің төмендігінде жатыр.
Бүгінде еңбек нарығында ақпараттық технологияны меңгерген, дарынды, болашағынан зор үміт күттіретін мамандарға сұраныс ерекше жоғары. Мемлекет басшысы, сондай-ақ жоғары оқу орындары мен колледждердің студенттерін жатақханамен қамту мәселесі өте өзекті екеніне де назар аударды. Соған сәйкес 2022 жылдың соңына дейін студенттерге арналған кемінде 75 мың орындық жаңа жатақхана салынады.
Александр СМИРНОВ,
«Суоми» карел-фин ұлттық-мәдени бірлестігінің төрағасы
