Өнер музейі мен «Шығыс Ақпарат» медиахолдингі бірлесе ұйымдастырған көрмеге саналы ғұмырын облыстық «Дидар» газетіне арнаған фототілшінің 60-тан астам суреті қойылыпты. Шығыстың шырайлы табиғаты, көркем көлдері, тәкаппар таулары, шың басында асыр салған бұғы-маралдары, аңқылдаған адамдары... Әйгілі Мұстафа Өзтүріктің Өскеменге келген сәті, Алтайдың кербұғысы атанған атақты жазушы Оралхан Бөкей, қара сөздің хас шебері Қалихан Ысқақ, қаһарман Қасым Қайсенов, абыз ақсақал Бошай Кітапбаев, «Достарымдай» туындыны сыйлаған сазгер Оралхан Көшеров... Шығыс өңіріндегі қазақ баспасөзінің қара шаңырағы «Дидар» газетінде 60, 70, 80-жылдары қызмет еткен Тұрғазы Нұқай, Мүсілім Құмарбеков, Серік Ғабдуллин, Кеңес Юсупов сынды қаламгерлер бейнесі... Осының бәрі көрме төрінен орын алыпты.
Фотокөрмеге келген жұрт дос-жарандары, әріптестері мен замандастары Есағаң деп еркелеткен арда азаматтың қолтаңбасы қалған ақ-қара, түрлі-түсті суреттерді қызыға тамашалады. Көрменің тұсаукесерінде облыстық «Дидар» газетінде 20 жылдан астам бас редактор болған Жұмәділ Әділбаев, фототілшінің әріптесі Ғылымбек Сәбитов, «Шығыс Ақпарат» ЖШС директоры Ирина Якунина сөз алып, Е.Орынбаевтың өз ісінің шебері ғана емес, отбасына қамқор, жолдастарына адал азамат болғанын тебірене еске алды.
«Есағаңмен 30 жылға жуық бірге жұмыс істедім. 90-жылдардың ортасына таман техника дамып, фотоаппараттың жаңа түрлері шыға бастағаны белгілі. Фототілшілер, әсіресе өзге ұлт өкілдері сандық фотоаппаратпен жұмыс істей бастады. Біздің Есімхан ескі әдіспен пленкаға түсіріп, қағазға шығарып жүрді. Ол қағазы бір күні сарғайып, бір күні ағарып кетеді. Кей күндері «неше күн жүріп түсірген суретің мынау ма?» деп ренжісіп қалған кездеріміз де болды. Сонда Есағаңның: «Жұрт қатарлы фотоаппарат алып бере алмаған редакцияларың құрысын» дегені бар. Сол сөзі қамшы болды да, Алматыдағы таныстарға айтып 4 мың доллар тұратын сандық фотоаппарат алдырып бердік. Ол кезде бір «Ниваңыз» 3 мың доллар тұратын. Одан кейін бір жарым жылдан кейін «ескірді» деген соң тағы бір сандық фотоаппарат әпердік. Мына көрмедегі суреттердің көбі сол фотоаппаратпен түсірілген болатын», – деді Жұмәділ Әділбаев.
Жер жәннаты Жетісу өңірінде дүниеге келіп, төр Алтайда мәңгілік тыныс тапқан фототілшіні еске алу мақсатында түсірілген шағын фильм де бұл күні жиналған жұртшылықтың назарына ұсынылды. Фильмде Есағаңның әріптестері – жазушы Жұмағазы Игісін, облыстық «Дидар» газетінің бас редакторы Уәлихан Тоқпатаев, ардагер фототілші Сергей Суров өз естеліктерін айтыпты. «Ол қол басындай фотоаппаратымен қызықты, жақсы дүниелерді қалт жібермей, түсіріп алып, оған философиялық әр беріп, түрлендіріп, соны халықтың назарына ұсынды. Есағаң соңына мол мұра қалдырды. Бүгінгі көрме қас қағым сәтте атқарған қыруар жұмыстарының бір көрінісі» деп пікірін білдіріпті Ж.Игісін.
Тағылымды шараның ұйымдастырылуына ұйытқы болған белгілі журналист, қаламгер Айтмұхамбет Қасымов тұсаукесер соңында көрменің өтуіне көмек қолын созған «KazLider» холдингінің бас директоры Марат Мұзапаров пен «КМ компаниялар тобының» президенті Қайрат Мусинге алғысын айтып, Есағаңның өмірлік серігі Оралды мен балаларын сахнаға шақырып, марқұмның портреті мен фото-альбомын сыйға тартты. Өнер музейіндегі бұл фотокөрме бір ай бойы жұртшылық назарына ұсынылатын болады.
Азамат ҚАСЫМ,
«Егемен Қазақстан»
ӨСКЕМЕН
Суреттерді түсірген автор
