Ансамбль жетекшісі Шәкен Көпшікбаева бауырлас мемлекетте ұйымдастырылатын байқау ережесімен ғаламтор арқылы танысып, аудио және видео материалдарын жолдап, іріктеуден іркілмей өткендерін айтады.
«Бізге Иран Ислам Республикасының еліміздегі елшісінің қолы қойылған шақырту келді. Тарбағатай ауданының әкімі Ділдәбек Оразбаев өнер сапарымен өзге елге барып-қайтуымызға зор қолдау көрсетіп отыр. Қазақстан аумағындағы шығындарды өзіміз жапсақ, Тегерандағы шығынды Иран тарапы көтеретін болады. Тегеранда бірнеше концерт береміз», дейді ол.
Бүгінде ұмытылып бара жатқан көне аспаптарымызды қайта түлету мақсатында 2014 жылы Ақсуат мәдениет үйінің жанынан құрылған топ ирандықтарға арнайы репертуар әзірлепті. Ансамбльдің белді әншісі Еламан Құжыманов Тегеран төрінде Қазтуған жыраудың «Алаң да алаң, алаң жұрт» толғауы мен Алмас Ақатұлының «Домбырасын» әуелетсе, күйшілер Нұрғиса Тілендиевтің «Аққу», Дәулеткерейдің «Көрұғлы», халықтың «Бұлғын-сусар» күйлерін күмбірлетпек.
Азамат ҚАСЫМ,
«Егемен Қазақстан»
Шығыс Қазақстан облысы,
Тарбағатай ауданы,
Ақсуат ауылы
