Жөндеу барысында үйлердің шатырлары, қасбеттері, жертөлелері, жылу жүйелері, лифт шаруашылықтары қалпына келтірілді. Мемлекеттік қолдаудың арқасында қала тұрғындарына ондаған жылдар бойы жиналып, қолайсыздықтар туындатқан бірқатар мәселе шешілді. Айта кетерлік жайт, жөндеуден өткізілген үйлердің шығын қаражаты толық көлемде тұрғындардан қайтарылды.
2013 жылы аталған Бағдарламаның тоқтатылуы себебінен ескі үйлердің техникалық күйін жақсартуға бағытталған жоспарлы жұмысты жалғастыруға мүмкіндік болмады. Қала үйлерінің біршама бөлігі сонау Кеңес өкіметі заманында бой көтерген, қазіргі таңда кейбір ғимараттардың салынғанына 50 жылдан асты. Қаладағы 250-ден астам көп қабатты ғимарат, яғни барлық көп қабатты тұрғын үйдің 25%-ы жедел күрделі жөндеу жұмыстарын талап етеді. Бір ғана осындай ғимаратты жөндеуден өткізу үшін кемінде 25 млн теңге қаражат қажет. Еліміз бойынша жалақысы ең төмен деңгейдегі Петропавл тұрғындары үшін бұл қомақты қаражат. Пәтер иелерінің қысқа мерзімде аталған соманы жинауға мүмкіншілігі жоқ, алайда оларды Бағдарлама шарттары толығымен қанағаттандырып отыр.
Петропавл тұрғындары сайлаушыларымен кезекті кездесулер барысында осыған қатысты проблемалар: құлап жатқан шатырлар, істен шыққан лифтілер, жөндеуді қажет ететін кіреберістер мен жертөлелер мәселелері жиі қозғалады. Бағдарлама олардың көпшілігі үшін өмір сүру жағдайын оңтайландырудың негізгі тетігі болып отыр. Себебі жылу жүйесі және сумен жабдықтау жүйесі апаттық жағдайда тұрған, төбесінен су аққан және лифтілері істен шыққан үйлердің көп пәтерлерінде науқас қарттар мен балалар өмір сүріп жатыр.
Сондықтан халықтың негізгі қажеттіліктерін толық қанағаттандыруға жағдай жасамай отырып, қаланың одан әрі дамуы, инновациялардың таралуы және «ақылды» технологияларды енгізу туралы сөз қозғау ақылға сыймайды. Қала тұрғындарының көпшілігі үшін үйлерінің тозуы – өзекті мәселеге айналған. Олар Бағдарламаның қайтадан жалғасын табатындығына үміттенуде және өмір сүру жағдайларын жақсарту мүмкіндігін күтуде.
Осы мәселеге байланысты, біз Премьер-Министр Бақытжан Сағынтаевтың атына депутаттық сауал жолдап, Тұрғын үй-коммуналдық шаруашылығын жаңғырту бағдарламасын қайта жандандыру және Петропавл қаласының тұрғын үйлерін жөндеуге республикалық бюджеттен тиісті қаражат бөлу мәселесін қарастыруды сұрадық.
Ерік СҰЛТАНОВ,
Сенат депутаты
