Спорт • 29 Наурыз, 2018

Аргентина Испаниядан «нокаут» алды

114 реткөрсетілді

Осы аптада футболдан ұлттық құра­ма­лардың бірнеше жолдастық кездесулері өтті. Бразилия Германияны жеңіп, әлем чемпио­натында кеткен есесін қайтарғандай болды.

 

Жазда өтетін Ресейдегі чемпионаттың басты фавориттерінің бірі – Бельгия Сауд Ара­бия құрамасын 4:0 есебімен ойсырата ұтты. Ал жарысты қабылдайтын Ресей тағы бір мықты – Франция құрамасына өз алаң­ында 1:3 есебімен жеңілді. Ең қызығы Леонель Мессидің Аргентинасы Испа­ния­дан оңбай ұтылды. Есеп 6:1.

Осыдан бір апта бұрын Леонель Месси испан газеттеріне сұхбат берген-ді. «2018 жылғы әлем чемпионаты – мен үшін соңғы мүмкіндік. Одан кейін құрамада ойнауым екіталай. Қазір өзімнің бабымда жүрмін, мундиальда жеңіске жетуіміз Аргентина құрамасының өзге де футболшылары қазір жарқырап жүр» деп ағынан жарылған еді. Иә, расымен де «Манчестер Сити» сапындағы Серхио Агуэро да, «ПСЖ» сапындағы Ди Мария да нағыз бабында. «Ювентустегі» Гонсало Игуаин мен «Интердегі» Икардидің өзі неге тұрады?! Олар әр тур сайын гол соғып, көзге түсіп жүр. Футбол мамандары да Аргентина Ресейдегі чемпионатта жеңіске жетуі мүмкін деп топшылаған. Алайда...

Алайда, Аргентина құрамасындағы ойын­шылардың барлығы да керемет емес екен. Қорғаныстың әлсіздігі, орталық жартылай қор­ғаушылардың сылбырлығы «албиселесте» құрамасының осал жерлерін көрсетті. Оған біз күні кеше өткен Испания – Аргентина матчында көз жеткіздік. Бас бапкер Хорхе Сампаоли Леодан басқа атақты футболшыларын тегіс алаңға шығарды. Мессидің санындағы жарақат ушығып кетпесін деп, бапкерлер оны ойынға қатыстырмады. төрт дүркін «Алтын доптың» иегері ойынды «Сантьяго Бернабеудің» трибунасында отырып тамашалады. Негізінен Ис­панияның ойынын тамашалады десек артық емес. Себебі Аргентина бұл матчта қақпасынан доп алумен болды. Матчтың небәрі 12-мину­тын­да Испания іске кірісіп, Диего Коста ойын­ның есебін ашты. Коста бастаған істі әрі қарай Иско іліп әкетті. «Реал» жартылай қорғаушысы бұл матч­та хет-трик жасады. Арасында Алькантара бір мәрте, тіпті құрамаға енді алынып жүрген Диего Аспастың өзі гол салды. Жалпы ал­ғанда ерінбегеннің бәрі Аргентинаға гол соқты. 74-минутта Иско таблодағы көр­сеткішті 6:1 жасағанда Леонель Месси қолын бір сілтеп, трибунадан тайып тұрды. Оған дейін де Мессидің көңіл-күйін аңдып отырған фототілшілер атақты аргентиналықтың күңіренген түр-әлпетін таспаға түсіре беріпті. Сол фотолардың басым көпшілігі испан газеттерінің алғашқы бетінде жарияланды.

Иә, расымен де Аргентинаны мұншама осал ойнайды деп ешкім күткен жоқ. Жарты әлем Лео бастаған құраманы Әлем чемпионатының фавориті санап еді. Енді қалай болар екен? Біріншілік басталуға бірнеше ай қалғанда Аргентина өзінің тарихындағы ең ауыр жеңілістердің бірін қайталап отыр. «Албиселесте» 1968 жылы Чехословакиядан, 2009 жылы Боливиядан 6:1 есебімен жеңілген.

Айтпақшы, Криштиану Роналду бас­та­ған Португалия құрамасы Нидерланды ұжы­мына өз алаңында 0:3 есебімен есе жіберді.

 

Ермұхамед МӘУЛЕН,

«Егемен Қазақстан»

 

Баннер
Соңғы жаңалықтар

Астық үшін арпалыс

Аймақтар • Кеше

Ән мен дәм

Қоғам • Кеше

Әкенің беделі

Аймақтар • Кеше

Қазақтың алтын қазынасы

Руханият • Кеше

Ұқсас жаңалықтар